Besëlidhja ka nisur nga puna për ndërtimin e skuadrës për sezonin e ardhshëm.
Hapi i parë ishte emërimi i trajnerit dhe në vend të Gledis Lanit erdhi Ndriçim Kashami, kavajasi që sezonin e shkuar ishte në krye të Apolonisë.
Por tanimë duhen bërë përforcime, pasi në Lezhë askush nuk dëshiron ta bëjë më sezonin e fundit, ku vetëm në fund u siguria pesëshja e parë, ndërkohë që për të luftuar për ngjitjen në Superiore as që bëhej fjalë.
Kishte disa vite që Besëlidhja i afrohej rikthimit në elitë, por në fund kanë ngecur gjithmonë.
Këtë sezon do tentohet që të rivalizojnë sërish, por duket e vështirë me Vllazninë në grup me ta.
Sezonin e fundit ishte Tirana klubi që i bëri të dorëzoheshin në grupin B. Mbetet për t’u parë nëse do të ndodhë e njëjta gjë edhe në grupin A.
Te Besëlidhja ndërkohë kanë në plan të fokusohen tek elementët e rinj vendas, ndërthurur edhe me disa lojtarë me eksperiencë.
Veç trajnerit Kashami, tanimë është konfirmuar edhe një lëvizje tjetër në merkato te Besëlidhja.
Portieri Fabiol Rexhepi është rikthyer te lezhjanët. Shkodrani ishte vjet pjesë e Tërbunit, ndërkohë që për tre sezone më parë është aktivizuar te Besëlidhja.
Portieri 26-vjeçar në të shkuarën ka qenë pjesë edhe e Vllaznisë. Pritet që në ditët në vijim të ketë edhe afrime të tjera në ekip, në mënyrë që ekipi të plotësohet pa nisur përgatitjet.
Sa i përket largimeve, deri më tani është konfirmuar Edison Ndreca, që do e vijojë karrierën te Teuta në Superiore. /EDS/
