Me fitoren e djeshme ndaj Vorës, Veleçiku tregoi edhe njëherë tjetër se pavarësisht largimeve që ka patur, do të tentojë të bëjë jo pak surpriza në sezonin e ri.
Sfida në mes dy debutesve në këtë kampionat, është fituar nga koplikasit me shifrat 2-1. Kjo gjë e ka entuziasmuar trajnerin e tyre Besnik Duli që në një prononcim për “Shkodra Sport” vlerësoi paraqitjen e futbollistëve të tij.
“Djemtë treguan shumë dëshirë në fushën e lojës. Fakti që shumica e ekipit është me lojtarë të rinj është pak problem megjithatë ata vrapojnë pafundësisht dhe kjo na bën shumë kompetitivë.
Na mbetet të rregullojmë diçka në manovrën sulmuese sepse humbasim shumë raste, gjithsesi kjo fitore do të na vlejë shumë për të ardhmen”- ka thënë ai.
Edhe ndaj Vorës mungoi mbrojtësi brazilian të cilit ende nuk i ka ardhur dokumentacioni nga klubi i mëparshëm.
Me aktivizimin edhe të tij, normalisht që forca e skuadrës do rritet megjithatë koplikasit kanë frikë shumë arbitrimin që në dy ndeshjet e para i ka dëmtuar jo pak në fakt.
© shkodrasport.com
