Aventura e Besnik Hasit në Arabinë Saudite mund të shkojë shumë shpejt drejt fundit jo edhe aq të lumtur. Trajneri shqiptar nuk po arrin të mbajë Al Raed afër kreut të klasifikimit, siç parashikohej kur ai mori drejtimin dhe vetëm 11 pikë pas 10 ndeshjeve të para janë shumë pak për drejtuesit e klubit.
Edhe pse Hasi ka në dispozicion lojtarë të kalibrit të Ferhan Hasanit apo Ismail Bangura, ekip i tij deri tani ka qenë shumë larg pritshmërisë, me vetëm 3 fitore, 2 barazime e 5 humbje. Si rrjedhojë,që tani kanë filluar zërat për një shkarkim pa u mbyllur viti 2018 të teknikut i cili në qershor nënshkroi me Al Raed.
Megjithatë, në Greqi nuk e shohin këtë si një lajm edhe aq të keq për Hasin. Mediat greke bëjnë të ditur se Hasi nuk do të vononte të gjente punë, pasi është piketuar nga FSHF si pasardhësi i Kristian Panuçit në stolin e kombëtares shqiptare.
“Situata e tij po monitorohet me interes nga Shqipëria, pasi ata e vlerësojnë si emrin e përshtatshëm për të zëvendësuar Kristian Panuçin”, shkruan “Sportime.gr”.
Pas një tjetër eksperiencë të mbyllur me dështim, pas atyre te Legia e Olimpiakos, ndoshta përfaqësuesja shqiptare do të ishte alternativa më e mirë e mundshme që do t’i mbetej teknikut i cili nuk ka arritur suksese përtej atyre të siguruar në vitin e tij të parë te Anderleht. /vipsport/
