Ish- futbollisti i kombetares shqiptare Besnik Hasi rikthehet serish ne pankine. 51 vjeçari nga sot është trajneri i ri i KV Mechelen. Ish-trajneri i RSC Anderlecht nënshkroi kontratë deri në fund të sezonit me ekipin e Superligës belge të futbollit. Ai pason në stol Steven Defour.
Shqiptari nga Gjakova prej 5 marsit të 2022 ka qenë pa asnjë klub, qysh prej kohës kur u shkakrua nga Al-Ahli. Në karrierën e tij ai ka drejtuar Anderlechtin, Legian e Varshavës, Olympiacos, Al-Read apo edhe Al-Ahli.
Hasi tanimë ka një detyrë të vështirë, duke marrë përsipër ringritjen e ekipit që ndodhet në pozitën e 14-të në kampionat. Vetëm një javë më parë, KV Mechelen u eliminua nga Kupa prej amatorëve të Knokke, çka solli edhe shkarkimin e Steven Defour.
Besnik Hasi tashmë po mban shpresat te lojtari i dymbëdhjetë,duke ftuar tifozët në stadium në komunikimin e parë për faqen e klubit. “Si lojtar dhe si trajner, gjithmonë kemi pasur frikë të luajmë kundër KV Mechelen, veçanërisht në shtëpi. Kemi tifozë që mbështesin me fanatizëm ekipin e tyre. Prandaj u bëj thirrje të gjithë tifozëve që të shtunën të vijnë masivisht në stadium me ngjyrat verdhekuqe”, tha Hasi.
Kujtojmë se Hasi ka qenë kandidat edhe për stolin e Kombëtares së Shqipërisë në disa raste.
