Në garën e fundit, atë të Krosit Kombëtar, ai ka zënë vendin e dytë duke u shpallur nënkampion Shqipërie në këtë disiplinë sportive. Bëhet fjalë për atletin shkodran Bledar Mesi i cili është nga më të mirët në këtë garë prej vitesh. Ai ka qenë në jo pak raste edhe kampion i vendit. Nëse këtë herë nuk ka dalë i pari (vend që e zuri një atlet i Skënderbeut), kjo e ka një shpjegim. “Kohët e fundit kam qenë për një trajnim me ushtrinë në Francë dhe prandaj nuk kam patur shumë kohë në dispozicion për t’u stërvitur. Kjo ndikoi edhe në paraqitjen time në garën e sivjetme të krosit megjithatë e rëndësishme është që Vllaznia si ekip sërish nuk hoqi dorë nga vendi i parë. Madje mesa di unë, në këto gjashtë vitet e fundit, ajo ka qenë gjithnjë kampione”-ka thënë Mesi. Ai ka zënë vendin e dytë por kjo garë është dominuar nga atletët e Vllaznisë sepse Xhaneto Zefi është renditur i treti dhe Florian Balaj i katërti. Një sukses ky për këtë ekip, ashtu siç ka qenë e mirë edhe paraqitja e Griselda Krymit që ka zënë vendin e dytë për femra. Po ashtu, e suksesshme ka qenë edhe paraqitja e ekipit të të rejave me trajner Fatjon Serhatin që ka zënë vendin e dytë në renditjen ekipore. Vllaznia ka dominuar në garat e krosit dhe atletët e saj pritet të jenë edhe baza e ekipit kombëtare që do marrë pjesë në Krosin Ballkanik që zhvillohet në Stamboll muajin tjetër. Në lidhje me këtë garë, Bledar Mesi do të thoshte kështu për gazetën online www.shkodrasport.com: “Ende nuk është vendosur sepse pritet nesër mbledhja e kryesisë por me shumë mundësi, ne të tre atletët e Vllaznisë do jemi pjesë e ekipit tonë kombëtar dhe shpresojmë që në garën e Krosit Ballkanik të bëjmë një paraqitje sa më të mirë”. 30 vjeçari nga Shkodra është optimist për këtë dhe të shpresojmë në arritjen e një rezultati sa më të mirë.
www.shkodrasport.com
Bledar Mesi me diplomen e vendit te dyte dhe kupen e ekipit kampion ne garen e krosit kombetar te zhvilluar pak dite me pare ne Tirane.
