U afrua te Partizani në merkaton e verës së shkuar dhe pritej të ishte një nga lojtarët titullarë në formacionin e të kuqve.
Por, ecuria e Blerim Kotobellit në mënyrë të pashpjegueshme kishte luhatje. Herë titullar e herë në stol. Megjithatë ai ishte aty për të dhënë kontributin e tij sa herë skuadra kishte nevojë.
Tashmë i ka dhënë fund aventurës me 15-herë kampionët e Shqipërisë, por me sa duket me drejtuesit nuk është ndarë si duhet.
Në një intervistë ekskluzive për newsport.al, 25-vjeçari tregon se ende nuk ka marrë pagat që i takojnë nga klubi i Partizanit.
Madje thekson se drejtuesit i kanë bërë të ditur që do të shlyhet vetëm 1/3-tën e 4 muajve. Me sa duket kjo situatë do të precipitojë, pasi mëngjërashi është i vendosur për t’i shkuar deri në fund kësaj çështje.
Ai tregon se ka marrë një avokat dhe tashmë do të jetë Dhoma e Zgjidhjes së Konflikteve në Federatën Shqiptare të Futbollit që do t’i japë zgjidhje.
Madje për newsport.al zbulon prapaskenat se si drejtuesit e kuq i kërkonin me doemos në merkaton e verës së shkuar që t’i bashkohej 15-herë kampionëve të Shqipërisë.
– Blerim jeni larguar nga Partizani. A mund të na thoni se çfarë po bëni momentalisht?
Po, u largova nga Partizani dhe tashmë po pushoj pranë familjes sime. Po stërvitem individualisht për të mos humbur formën dhe të jem gati për sezonin e ri.
– Kur thoni për sezonin e ri, ç’nënkuptoni? Ju ende jeni pa skuadër…
Kam oferta nga tre klube të Superiores, madje shumë shpejt do të vendos për të ardhmen time. Jam i lumtur që më duan në gjirin e tyre dhe po i shqyrtoj mundësitë me kujdes.
– A mund të na thoni emrat e tyre?
Nuk është profesionale dhe më vjen keq, por s’mund t’i them. Iu siguroj që janë klube që kanë bërë histori në kampionatin shqiptar.
– Skënderbeu dhe Tirana janë skuadrat e historisë, ndërsa vitin e fundit Luftëtari. Është ndonjëra nga këto?
Mos këmbëngulni sepse nuk mund t’iu them gjë. Më vjen keq, por më duhet të respektoj korrektesën e drejtuesve që më kanë ofruar të jem pjesë e skuadrave të tyre.
– A jeni kaq këmbëngulës edhe në fushën e blertë?
(Qesh) S’e keni parë? Sigurisht, ndaj dhe u largova nga Partizani pasi s’pata hapësira dhe nuk u trajtova ashtu si duhet.
– Kur thua “S’më trajtuan si duhet”, ç’nënkupton?
Keni qenë të gjithë ju gazetarët prezentë në seancat stërvitore. Jepja maksimumin, mundohesha të bëja më të mirën, por sërish në formacion ishte e vështirë ta shihje veten.
Madje mund t’iu përmend rastin kur luajtëm në Kukës dhe fituam. Atë ndeshje isha titullar. Pas takimit më nxorrën në konferencë pasi kisha bërë një ndeshje të mirë. Më pas, në sfidën e ardhshme e pashë veten papritur në stol.
– Po çfarë ndodhte te Partizani? Kush vendoste për titullarët?
Kush tjetër? Trajnerët. Nuk më pëlqen t’i futem këtyre detajeve pasi unë tashmë e kam mbyllur aty. Pas një sezoni të shkëlqyer me Teutën, te Partizani u munduan të më ulnin. Kjo ishte një arsye e fortë që u largova, edhe pse drejtuesit më ofruan rinovimin.
– E keni marrë leje-kalimin nga klubi?
Mund t’iu them që këto ditë isha në Tiranë për të mbyllur gjithçka, përfshirë edhe çështjet financiare.
– Si u ndatë me drejtuesit?
Prisja të ishte ndryshe sepse në kanalin zyrtar pashë që më falënderonin për kontributin e dhënë me fanelën e kuqe. Por, në momentin që kërkova të shlyhesha për atë që kisha dhënë, mora një përgjigje negative.
– Negative? Nuk jeni paguar?
Unë kam 4 rroga të pashlyera ende nga klubi i Partizanit. Problemi nuk qëndron këtu. Problemi është se kur kërkova nga drejtuesit një shpjegim se pse nuk më kanë paguar, m’u tha që rrogat do të derdheshin në llogari, por s’do të ishin të plota. Do të mar më pak se 1/3-tën e asaj që ma takon.
– Po ç’do bëni? Do t’i pranoni këto kushte?
Sigurisht që jo! Kontratat s’mund të zh’bëhen dhe gjithçka janë aty të shkruara. Nëse nuk më trajtojnë si duhet, do t’i drejtohem organeve ligjzbatuese, në rastin konkret do e çoj çështjen në Dhomën e Zgjidhjeve të Konflikteve. Aty do të kërkoj të drejtën time.
– Në merkaton e verës së shkuar, drejtuesit e kuq iu kërkuan me ngulm. Çfarë ka ndodhur që marrëdhëniet tuaja kanë marrë rrjedhë të tillë?
Nuk e di. Është e vërtetë kjo që thoni ju. Nuk më pëlqen të përmend emra, por njëri nga drejtuesit më merrte çdo ditë në telefon që të firmosja për të kuqtë.
Megjithatë tashmë kjo është e shkuar. Uroj që Partizani dhe sidomos për tifozët e mrekullueshëm, që të festojnë titullin e munguar prej kohësh. /newsport/
