Dita e djeshme ka shënuar mbledhjen e parë për këtë vit të Bordit Mbikëqyrës të klubit të futbollit Vllaznia. Siç është bërë e ditur, në këtë mbledhje përveç anëtarëve të tij, ka marrë pjesë edhe kryebashkiaku Lorenc Luka. Po ashtu të pranishëm kanë qenë edhe dy drejtuesit e lartë të klubit, administratorit Neritan Kalamishi dhe drejtori sportiv Armir Grima. Bashkë me ta ka qenë i pranishëm edhe trajneri i skuadrës Baldo Raineri.
Siç kanë theksuar anëtarët e Bordit, kjo thjesht ka qenë mbledhja e rradhës e tyre dhe meqë ishte e para për këtë vit, është diskutuar gjerësisht edhe për vazhdimësinë
Garancia e pagesave
Administratori Kalamishi ka bërë të ditur pas mbledhjes se Bordi ka dhënë garancinë maksimale për rregullsinë në pagesa të skuadrës. Në fakt, është krijuar një problem i vogël ngaqë fondi prej 80 milionë lekësh i miratuar nga Këshilli Bashkiak në gjysmën e dhjetorit ende nuk ka kaluar në numrin e llogarisë së klubit pasi Thesari ka bllokuar veprimet megjithatë gjysma e rrogës që ekipi ka marrë në ditën e fundit të dhjetorit, do të pasohet me të tjera pagesa që do të bëhen në ditët në vazhdim. Numri 1 i klubit ka bërë të ditur se gjatë ditës së sotme, futbollistët do të marrin edhe një rrogë të plotë ndërsa pjesën e mbetur të rrogës së dytë do ta marrin deri të martën e javës që vjen. Në këtë mënyrë, do të likujdohen të gjitha pagesat e prapambetura që klubi ka patur ndaj skuadrës.
Stërvitja në Ulqin
Në kampin kuqeblu ka patur edhe një dilemë nëse stërvitja dimërore do të zhvillohej në Shkodër apo në Ulqin por dje është saktësuar çdo gjë. Kryetari i Bordit Xhevdet Amuli pasi është konsultuar edhe me anëtarët e tjerë të tij, ka vendosur që skuadrës t’i krijohen të gjitha kushtet për një stërvitje të mirë në prag të nisjes së gjysmës të dytë të sezonit. Për këtë arsye, është vendosur që ditën e nesërme ekipi të niset drejt Ulqinit për t’u stërvitur atje për një periudhë 10 ditore apo dhe ndoshta edhe dyjavore. Për këtë tashmë nuk ka më asnjë dilemë.
Takimi me skuadrën
Për të sqaruar edhe njëherë të gjithë situatën financiare në klub dhe përpjekjet maksimale që Bordi po bën për t’i krijuar të gjitha kushtet Vllaznisë, është lënë një takim i të gjithë anëtarëve të tij me skuadrën. Kjo pritet të ndodhë pas stërvitjes së sotme teksa do ketë vend për një kafe sëbashku edhe përpara nisjes për në Ulqin. Në këtë takim kryetari Amuli pritet që të sqarojë futbollistët dhe stafin drejtues për të gjithë anën financiare teksa do merret vesh për dy pagesat që do të bëhen për të shlyer detyrimet e prapambetura dhe po ashtu do garantohet edhe e ardhmja financiare e klubit për pjesën e mbetur të këtij sezoni. Bashkia Shkodër është duke përgatitur buxhetin paraprak për këtë vit dhe kuptohet që çdo muaj Këshilli Bashkiak do të kalojë një fond të konsiderueshëm për kryerjen e të gjitha pagesave që janë të parashikuara në kontratë. Madje merret vesh se drejtuesit e Bordit me anë të donacioneve të ndryshme apo dhe të ardhurave dytësore, po mendojnë që gjatë periudhës janar- maj të mbyllin edhe të gjithë detyrimet e prapambetura të klubit ndaj palëve të treta. Kjo është një garanci e madhe e cila është marrë përsipër nga palët në mbledhjen e djeshme dhe tashmë Vllaznia shumë shpejt pritet të kthehet në normalitet.
