FIFA ka përcaktuar vlerat e shpërblimit për ekipin fitues të Botërorit të Klubeve, që po zhvillohet në Emiratet e Bashkuara Arabe. Edhe në një kompeticion shumë të shkurtër, siç është Botërori Klubeve, përfitimet financiare mund të jenë të konsiderueshme. Ja pse vendi i parë, por edhe të tjeërët, kanë rëndësi. Fituesi i kompeticionit, ku Reali i Madridit është favorit, do të përfitojë 5 milionë dollarë, ose 4.2 milionë euro. Vendi i dytë fiton 4 milionë dollarë ose 3.6 milionë euro, i treti 2.5 milionë, i katërti 2 i pesti 1.5 dhe i gjashti 1 milion dollarë.
Ekipi i eliminuar, Auckland, do të marrë 0.5 milionë, ndërkohë që të gjitha shpenzimet e udhëtimit dhe akomodimit mbulohen nga FIFA.
Në fakt, për Realin e Madridit, që zbret në fushë më 13 dhjetor ndaj Al Jaziras, nuk ka më shumë rëndësi ana financiare se ngritja e trofeut, që është prodhuar në Birmingham dhe përbëhet nga metale të çmuara. Trofeu ka një sferë, që përfaqëson planetin dhe që mbështetet në 6 shtylla. Ky trofe është 50 centimetra i gjatë dhe peshon 5.5 kg.
