Rusia pritet të vizitohet nga rreth 1 milion turistë gjatë zhvillimit të kampionatit botëror të futbollit, ku një pjesë e madhe e ndeshjeve do të zhvillohen në Moskë.
Në mediet e huaja, po qarkullon historia e veçantë e një tifozi gjerman dhe qenit të tij besnik.
Bëhet fjalë për 70 vjeçarin, Hubert Wirth, i cili drejton një kamion të prodhuar në vitet 1920, që shumica e njerëzve e përshkruajnë atë si “shtëpia me rrota”.
Tifozi i veçantë e ka marrë përsipër këtë udhëtim edhe pse është i vetëdijshëm se do i duhet më shumë kohë, se po të udhëtonte me avion ose makinë, pasi shpejtësia më e madhe që mund të arrijë ky kamion është jo më shumë se 30 kilometra në orë.
Ai aktualisht jeton në Bjellorusi dhe sipas llogaritjeve tifozi gjerman i duhet të udhëtojë deri në 1,000 kilometra përpara se të arrijë destinacionin e tij.
“Kjo mënyrë transporti ka shkaktuar kënaqësi, befasi dhe, natyrisht, keqardhje; pasi ai është një njeri i varfër dhe automjeti që përdor është shumë i vjetër”, ka thënë një banor.
Një tjetër banor e përshkroi traktorin si “Nga jashtë duket një furgon birre por në fakt është një shtëpi me rrota”.
Kuriozë të shumtë kanë filmuar rrugën që ka përshkruar ky tifoz. Kupa e Botës Rusi 2018 fillon më 14 qershor – dhe në këtë mënyrë ky tifoz po përballet me një garë kundër kohës për të qenë gati për fillimin e këtij kompeticioni. /EDS/
