Vllaznia do të luajë nesër ndaj Kastriotit në Kamëz një ndeshje delikate dhe në rast fitoreje, ajo do të rihynte sërish fuqishëm në pretendimet e saj për titullin kampion. Trajneri Thomas Brdariç në konferencën e sotme për shtyp ka shprehur besimin se skuadra që ai drejton do të arrijë ta fitojë këtë përballje. Sipas tij, nëse ajo punon në qetësi, do t’I arrijë objektivat e këtij sezoni.
– Më e qetë skuadra pas kualifimit në gjysmëfinale të Kupës?
Ndihemi shumë mirë, kemi arritur në gjysmëfinale dhe besoj se skuadra ka treguar një lojë të mirë.Gjithçka e kemi arritur me mund e me djersë dhe tashmë na takon të qetësohemi pak dhe të mendojmë për ndeshjen e rradhës që kemi dhe duhet të përqendrohemi 100 për qind për sfidën ndaj Kastriotit.
-Pas fitores 3-0 të Vllaznisë fazën e parë ndaj Kastriotit fazën e parë filloi ngjitja e skuadrës. Do të përsëritet nesër e njëjta gjë?
E rëndësishme është të fokusohemi tek puna dhe tek suksesi. Jam i bindur se nesër do të fitojmë ndaj Kastriotit dhe duhet të jemi në 100 përqindshin tonë që t’ia dalim. Ne i njohim anët e forta të Kastriotit, e dimë që janë një ekip kompakt, kanë përgatitje të lartë fizike. Edhe ne gjithashtu kemi përgatitur një plan për të luajtur ndaj kësaj skuadre, që të dominojmë në fushën e lojës. Duhet të tregojmë vlerat tona dhe të arrijmë tek fitorja.
– Sa do të ndikojnë mungesat e disa lojtarëve titullarë në këtë takim?
Ne nuk jemi ankuar kurrë për atë pjesë. Nuk jemi shqetësuar kurrë për atë pjesë që nga momenti kur kam ardhur unë këtu. Detyra ime është të punoj me ato lojtarë që kam në dispozicion. Nuk jemi ankuar edhe pse në muajt e fundit disa lojtarë nuk kanë qenë në formën e tyre më të mirë apo dhe kanë gabuar.
Ne si staf teknik e kemi për detyrë t’i përgatisim lojtarët që të jenë në maksimumin e tyre. Shumë e rëndësishme është që ta kemi të qartë se në rrugën e gjatë të kampionatit, do të ketë edhe probleme, ka ulje e ngritje, por kjo nuk do të thotë se nuk jemi në nivelin e duhur.
-Një fitore nesër, e mban Vllazninë në vendin e duhur për objektivin?
Jam shumë i bindur se nëse gjërat i marrim me qetësi deri në fund, do ta arrijmë objektivin tonë, por e përsëris, duhet ta marrim me qetësi. Nëse na ushtrohet presion se duhet të fitojmë, nuk është gjë e mirë. E rëndësishme është që ekipi të ndjehet mirë, të përmbushë detyrat e tij dhe të zhvillohet në fushë.
Në dy fazat e parë e kemi bërë këtë gjë kur ekipi ka luajtur shumë mirë. Janë bërë edhe disa gabime dhe i kemi lejuar ato gabime. E rëndësishme është që ato gabime t’i marrim, t’i përpunojmë dhe të mësojmë prej tyre. Detyra jonë është të tregojmë forcat tona që kemi. Nuk duhet të merremi shumë me të kaluarën, por të ecim përpara. Unë mendoj se kemi bërë një sezon shumë të mirë ku kemi dhënë më shumë gjëra pozitive se negative.
