Sporti i futsalles është rikthyer pas 5 vitesh mungesë në Shkodër. Ekipi i Vllaznisë është riformatuar sërish dhe duket se një projekt serioz dhe afatgjatë ka nisur tashmë. Këtë e konfirmon edhe trajneri i kësaj skuadre, Bujar Celufaj.
Ai thekson se skuadra po merr formë nga dita në ditë dhe se pas një mungese kaq të gjatë gjithçka duket se nis nga e para, por tek kuqeblutë janë të përgatitur për të bërë gjëra pozitive këtë edicion.
Celufaj tha: “Rikthehemi pas 5 vitesh mungesë dhe realisht janë shumë të themi të drejtën. Niveli i futsallës ka rënë në këto vite, ku më përpara kishte me të vërtetë ekipe të mirë investuara dhe me shumë nivel.
Ne e kemi filluar kampionatin me një fitore kundër Teutës, që është nën kampione e vendit. U habitën të gjithë që një ekip si Vllaznia, i formuar për dy javë arriti një sukses të tillë. Kjo tregon për cilësinë që kemi nga grupi i 15 lojtarëve dhe ambiciet e këtij edicioni.
Besoj se do jetë një projekt afatgjatë dhe shumë serioz nga ana e presidencës. Që po i kthen Shkodrës një sport që ka mbushur plot pallatin e sportit në vitet e shkuara. Tashmë ne e kemi të qartë objektivin që është “play off”, por pastaj duke i marrë takimet me rradhë mund të pretendojmë pse jo edhe për gjëra më të mëdha”.
Emdri ÇINARI
