Cafu ishte në Trento për festivalin vjetor sportiv, ngjarje e organizuar nga “Gazzetta dello Sport” me shumë të ftuar VIP. Këta të fundit folën nga skena, por edhe iu përgjigjën pyetjeve të gazetarëve të pranishëm.
Marcus Cafu ishte mes tyre, teksa u ndal fillimisht në karrierën e tij dhe pse pothuajse nuk u bashkua me kuqezinjtë nga Roma në vitin 2003. Ndërsa biseda vazhdoi, ai kujtoi me nostalgji karrierën e veçantë në “San Siro deri” me ngjyrat kuqezi, në “pensionimin” më 2008:
“Ancelotti donte të luante me mua vetëm 12 ndeshje në sezon, por në fund i luajta të gjitha ndeshjet me Milanin, derisa mbusha 38 vjeç. Unë kurrë nuk kam dashur të pushoj, kemi fituar gjithçka që duhej të fitonim. Sekreti ishte se kishim një skuadër që vraponte aq shumë, sa duhej të ishim në maksimum fizikisht”.
Raporti me trajnerin e Milanit në atë kohë (Ancelottin) rezultoi një moment kyç në rrugën e karrierës së mbrojtësit të djathtë brazilian: “Ancelotti ishte trajner, baba, vëlla. Ai ishte gjithçka për mua”.
Presidenti Silvio Berlusconi ishte në krye të kuqezinjve për më shumë se 30 vite dhe me prani pothuajse të vazhdueshme në dhomat e zhveshjes: “Ai vinte në Milanello dhe jepte këshilla për taktikat, vendosjen e skuadrës dhe shumëçka tjetër. Çdo ditë kishte një taktikë të re në mendje, vinte e na jepte këshilla, por i respektonte të gjithë lojtarët”.
Lojtarët përfshinin shokun e skuadrës së Cafu në atë kohë, Paolo Maldini, i cili vazhdoi të ishte drejtor te kuqezinjtë nga viti 2019 deri në shkarkimin shokues më 2023: “Maldini është simboli i Milanit. Ai ishte mbrojtësi më i mirë në historinë e futbollit.
Paolo e bëri Milanin të madh dhe duhet të punojë gjithmonë atje, në klubin kuqezi. Te Milani kam pasur shokë të jashtëzakonshëm. Nëse thua Paolo Maldini, me siguri nënkupton Milanin. Milani është Maldini dhe Maldini është Milani”.
Braziliani shpjegon si e solli rastësia te Milani, kur ishte nisur të firmoste diku tjetër, në Japoni: “Po shkoja në Japoni, te Yokohama, më pas më telefonuan Leonardo dhe Braida. Mendova se po bënin shaka, isha 33 vjeç, kisha një parakontratë me japonezët, ata kishin paguar tashmë. Unë ktheva gjithçka dhe shkova te Milani”./telesport/
