Një nga mesfushorët më të mirë të kampionatit shqiptar, malazezi Cetkoviç është shndërruar në një objekt diskutimi të merkatos nga disa ekipe të Superligës tonë. Konkretisht, Partizani, Tirana, Flamurtari dhe Kukësi kanë shfaqur interesim për të dhe madje ditën e djeshme, ai ka zhvilluar në Tiranë një takim edhe me presidentin e ekipit kukësian Safet Gjici por në fakt ende nuk e ka vendosur se ku do të luajë në sezonin e ri. Interesant është fakti se në kthimin e tij për në Mal të Zi, ai është ndalur në Shkodër për të takuar ish-trajnerin e tij tek Laçi Armando Cungu. Normalisht, temë e bisedës ka qenë edhe mundësia e veshjes së tij kuqeblu dhe një mundësi e tillë është lënë e hapur. Këtë gjë e ka zbuluar në një prononcim të tij vetë trajneri i ekipit shkodran gjatë një emisioni në televizionin Rozafa mbrëmjen e së hënës kur ka thënë: “Mund të zbuloj vetëm një nga emrat e lojtarëve që unë dëshiroj të kem tek Vllaznia dhe madje me njërin prej tyre jam takuar pasditen e sotme (djeshme) në ambjentet e Turizmit në Shkodër. Ai është mesfushori i Laçit Cetkoviç i cili aktualisht ka katër oferta por ka shfaqur dëshirën të punoj me mua dhe të vijë tek Vllaznia, nisur edhe nga raportet shumë të mira që kam patur gjatë kohës që kam punuar me të. Nuk dua të flas për vlerat e tij si futbollist sepse i njeh tashmë e gjithë Shqipëri sepse është mesfushori më i mirë i kampionatit shqiptar por ajo që më vjen keq është se unë u takova me të por nuk arrita të mbyll asgjë sepse akoma nuk e di se çfarë do të bëj unë. Prandaj dhe kam thënë se tek Vllaznia janë të vonuar. Lojtarë të tillë pastaj do të jetë shumë e vështirë për t’i gjetur. Në këtë mënyrë, drejtuesit e klubit nëse dua të bëjnë diçka të mirë, të lëvizin sa më shpejt sepse nesër do të jetë vonë. Vllaznisë nuk i vjen shpesh mundësia për të marrë lojtarë si Cetkoviç”.
© shkodrasport.com
