Chelsea, ashtu siç pritej, nuk e ka pasur të vështirë të mposhtte Stoke City në Stamford Bridge në ndeshjen e fundit të 2017 duke fituar me rezultatin e pastër 5-0. Skuadra e Hughes kishte mungesa të shumta në prapavijë dhe kjo ra në sy menjëherë. Pa Zouma dhe Shawcross në mbrojtje ishte shumë e vështirë të përballoje potencialin e madh të vendasve. Dhe golat erdhën menjëherë. Rudiger dhe Drinkwater i startuan goleadën e fundvititqë në 10 minutat e para.
Pedro finalizoi pjesën e parë me një tjetër gol nga distanca. Pas pushimit ishte Willian, lehtësisht lojtari më i mirë i ndeshjes, ai që gjeti edhe golin e merituar pas penalltisë që e fitoi vetë.
Surpriza më e madhe e ndeshjes ishte lënia jashtë e Eden Hazard nga formacioni i parë megjithëse Conte kishte paralajmëruar se do të bënte rotacion në ndeshjen e radhës. Me këtë fitore Chelsea ngjitet në vend të dytë mbi United që luan pas pak.
Liverpool ka vuajtur, edhe kjo pritej, por në fund ka arritur të marrë një fitore të rëndësishme ndaj Leicester në Anfield. Ishte Jamie Vardy ai që kaloi të tijtë në avantazh në mënyrë të befasishme pas një pasimi të Mahrez.
Vendasit u munduan me të gjitha mënyrat të barazonin rezultatin por ishin të pafat gjatë pjesës së parë. Pas pushimit aksionet e Të Kuqve u bënë më të rrjedhshme dhe si pasojë dopieta e të përhershmit Salah përmbysi gjithçka duke i dhënë fitoren skuadrës së Jurgen Klopp e cila me këtë fitore është ngjitur në vend të tretë.
