Ish-sulmuesi i Italisë, Christian Vieri, ka vënë në sedër profesionale gjeneratën e tanishme të sulmuesve (golashënuesve), duke kërkuar prej tyre të mos jenë më shumë të interesuar për Instagram-in se sa zanatin.
Ish-ylli i Interit, i cili shkëlqeu edhe me Juventusin, Atletico Madrid, Lazio dhe Milan, ndër të tjera, shënoi më shumë se 200 gola në vitet 1990 dhe në fillim të viteve 2000. Dhe, megjithëse tani gëzon gjërat më të bukura në jetë, duke pasur restuartante dhe një firmë mode, nuk harron të japë vlerësimet e veta për futbollin.
Vieri beson se sulmuesit e sotëm nuk punojnë aq fort, sa ai. 45-vjeçari tha: “Sot ju duhet vetëm një Instagram i mirë për të qenë sulmues”. Më tej, ai shtoi për “Radio Deejay”: “Ju nuk keni më nevojë për të shënuar 30 gola. Nuk ke nevojë për të shënuar çdo të diel.
Më parë, në qoftë se nuk arrije rezultatin e duhur, mbylleshe brenda në shtëpi, ktheheshe të nesërmen për të shqyrtuar gabimet që ke bërë dhe për t’i përmirësuar. Kjo nuk ndodh më. Ishim të sëmurë, të gjithë të brezit tim, sidomos sulmuesit. Ne ishim të sëmurë për gola”.
Vieri, i cili luajti për 15 klube dhe regjistroi 49 ndeshje me kombëtaren e Italisë, ishte largpamës në krahasimet mes tij dhe kapitenit aktual të Interit, Mauro Icardi, i cili është përshkruar si “një kafshë para portës”: “Icardi? Ne jemi shumë të ndryshëm. Personalisht, doja të luftoja me të gjithë rivalët për shënimin e sa më shumë golave. Kam shënuar rreth 140 gola në Seria A dhe, pak a shumë, i kujtoj ato të gjithë, madje edhe shanset që kam humbur”.
Megjithë ndarjen e tij ndaj brezit të ri, Vieri, i njohur si “Bobo”, nuk është i huaj edhe për mediat sociale. Ai ka 1.9 milionë ndjekës në Instagram, përkundrejt 4.1 milionë ndjekësve të argjentinasit Icardi./telesport/
