Rifillimi i futbollit në Shqipëri ka treguar edhe një herë se sa në mënyrë kaotike menaxhohet ai nga aktorët vendimmarrës të tij. Në mënyrë të papritur, edhe pse kishin në dispozicion thuajse 2 muaj më shumë për shkak të bojkotit, shumë ekipe të Superiores e panë veten pa stadium për të luajtur ndeshjet. Një situatë absurde që ka çuar edhe në zgjidhje qesharake.
Tirana pritëse në Korçë ndaj Kukësit, nuk është çudia e vetme që do të shihet në këtë javë të parë pas rifillimit. Java e dytë e Superiores pritet të dhurojë një tjetër çudi me protagonist po klubin bardheblu i cili pasi bëri fazën përgatitore mbi tapetin e stadiumit “Selman Stërmasi”, e sheh veten me një fushë të papraktikueshme në momentin që filloi sezoni.
Tirana do të luajë si pritëse edhe ndeshjen e javës së dytë në Superiore dhe si për ironi të fatit, ka vendosur që të jetë pritëse në fushën e rivalëve kryesorë për titullin kampion… me të cilët do të luajë këtë fundjavë.
Të dielën, Tirana ka në kalendar ndeshje ndaj Teutës, skuadra e cila i rrëmbeu si Kupën, ashtu edhe Superkupën në edicionin e kaluar. Bardheblutë, duke mos patur zgjidhje tjetër, kanë vendosur që këtë ndeshje ta luajnë në stadiumin “Niko Dovana” në Durrës, shtëpinë e rivalëve të tyre.
Një çudi shqiptare, pasi në asnjë vend tjetër një skuadër nuk do të pranonte të luante pritëse në fushën e rivalit kryesor, aq më tepër pikërtish ndaj tij, pasi do t’i jepte avantazhin të tregonte vlerat e veta në një ambient që njeh shumë mirë, me apo pa praninë e tifozëve.
Sigurisht, zgjedhja është diktuar nga rrethanat, por gjithsesi, ka krijuar një situatë shumë absurde që pritet të përsëritet në vijim në futbollin shqiptar duke parë problemin e vazhdueshëm me terrenet në klube të ndryhme. /vipsport/
