Megjithatë, ka ende shumë ndeshje për t’u luajtur, kështu që nuk mund të hiqet dorë nga titulli. Sidomos nga Kukësi, me një president si Safet Gjici. Ndaj nënkampionët duhet të reagojnë menjëherë. Ndryshe, paralajmërimet do të kthehen në vendime.
Dje, klubi verilindor ka analizuar humbjen e fundjavës së kaluar me Tiranën, e cila e ka ndërlikuar situatën. Presidenti Gjici nuk ka preferuar të jetë vetë në këtë mbledhje, duke konfirmuar mërzinë me të gjithë skuadrën, por ama është kujdesur për t’i transmetuar porositë të qarta.
Mësohet se rruga e vetme për t’iu kthyer sadopak normalitetit është fitorja në ndeshjen e radhës. E thënë ndryshe, duhet mundur medoemos Teuta në shtëpi. Trajneri Cungu është i pari që duhet ta kalojë këtë pengesë, që të “votëbesohet”. Në të kundërt, “rrufetë” e Gjicit janë gati të lëshohen edhe mbi të.
Pak a shumë në të njëjtën situatë janë edhe “djemtë e detit”. Pas barazimit në shtëpi me Kamzën, “laku është ngushtuar” edhe për Bledi Shkëmbin. Natyrisht, nuk ka paralajmërime publike për të, sepse kjo nuk është në natyrën e presidentit Hasanbelliu, por investimi i bërë duhet justifikuar.
Trajnerit korçar iu plotësuan jo pak dëshira edhe në merkaton e dimrit (Frashëri, Busic, Arapi, Vajushi), ndaj kërkohen rezultate. Teuta nuk mund të përsëritë “harakiri” në shtëpi si me kamzalinjtë. Zv.presidenti Ardian Bardhi ka konfirmuar trajnerin Shkëmbi, por edhe ai e “ka lënë litarin jashtë”, në njëfarë mënyre. Ka kërkuar reagim të menjëhershëm, që do të thotë fitore në ndeshjen e radhës, ndaj Kukësit.
Pra, ngado të sillen trajnerët respektivë, Cungu dhe Shkëmbi, të dy kovergojnë në një pikë: në javën e 22-të të Superiores duhet patjetër fitorja. Kjo ngjan me atë përplasjen e dy vezëve, ku njëra do të thyhet. Cili do ta ketë fatin e keq? Kjo mbetet për t’u parë, por në futboll ekziston edhe barazimi. A kënaq ky rezultat? Vështirë të bëjë punë për Safet Gjicin. Ndaj Cungu, edhe më shumë se Shkëmbi, është i paralajmëruar qartë…/telesport/
