Pas një faze përgatitore në Antalia, Kukësi ka zhvilluar sot stërvitjen e parë në tokën shqiptare, ku në Pezë Helmës, verilindorët kanë zbritur në fushën e blertë për përgatitjet e fundit anti-Apolonia. Ajo që pritet me më shumë interes nga verilindorët, është mundësia nëse mund të luajnë së bashku dy sulmuesit, Rexhinaldo dhe Shkurtaj, por kjo duket e pamundur për Cungun.
Në një prononcim për mediat, tekniku shkodran shprehet se e sheh të vështirë që të luajnë të dy, ndërkohë që ka besim se skuadra e tij do të shpallet kampion, duke pranuar se vetë ai, e do titullin kampion më shumë se presidenti Gjici.
“Dyshja e sulmit? Kampionati është i gjatë, kemi edhe Kupën në mes, mund të kemi situate që mund të ndodhë që të jenë të dy, por për momentin nuk e shoh të mundshme.
Postimi i Rexhinaldos? Nuk mund të merrem me Instagramin apo Facebookun, me postime sportistësh apo individësh, kushdo qofshin ata. Nuk mund të më vendosë kush kushte, nuk mund të më bëjnë presion. Nëse gjendet një zgjidhje mes klubit dhe sportistit, jam i detyruar ta mirëpres. Duhet të dimë diçka: një futbollist, kur firmos një kontratë në fillim të sezonit, nuk ndodh në asnjë vend që të jetë shkruar në kontratë se duhet të jetë medoemos pjesë e formacionit titullar.
Sa më shumë lojtarë, aq më mirë është, por ndonjëherë kthehen kundër. Nëse merr lojtarë shumë të mirë, krijohen situata të tilla, sepse të gjithë duan të luajnë. Më shumë sa e dëshiroj nuk e dëshiron njeri titullin kampion, ndoshta edhe më shumë se Gjici, sepse ai e ka provuar një herë”, u shpreh Cungu. /VipSport/
