Kukësi do të luajë nesër në transfertën e Korçës përballë Skënderbeut dhe në kuadër të këtij takimi, trajneri Armando Cungu ka dalë para medieve në konferencën e zakonshme. Ai ka komentuar gjendjen aktuale të skuadrës, duke parë edhe dëmtimet.
“Synimet janë për fitore në çdo ndeshje dhe nuk mendoj se Korça është më e dobët se vitet e tjera pasi pothuajse janë të njëjtët lojtarë të viteve te kaluara. E kanë nisur mirë kampionatin por nuk i druhemi Korçës. Më shumë respektojmë veten dhe duam të dalim me rezultat shumë të mirë në Korçë.
Nuk mendoj se kemi bërë gabime me Luftëtarin pasi kemi bërë që në fillim raste që i kemi shpërdoruar. Me pak kujdes, do të kishim pasur më shumë pikë. Ne bëjmë gabime në fazën mbrojtëse. Jemi munduar të ruajmë freskinë e lojtarëve pasi dhe ndeshjet janë të ngjeshura. Nuk eliminohen asnjëherë gabimet por minimizohen.
Gjendja e Rrumbullakut? Ka 4-5 ditë që del me ekipin pasi ka pasur një shkëputje dhe dëmtim jo të lehtë. Pres shumë shpejt që të jetë në gjendje.
Kemi treguar që kemi marrë rezultate të mira pasi edhe ekipet e mëdha kanë ditët e tyre jo të mira por jemi në rritje dhe e shohim veten si favorit.
Ne aspektin fizik kemi pasur humbje pasi nuk kemi Musollin, Rrumbullakun. Shameti që ka pasur dëmtim, por karakteri i Shametit nuk dorëzohet pasi nesër do të jetë në fushën e lojës. Kemi gabuar në fazën sulmuese por kemi vuajtur dhe sërish kemi marr rezultatet e pritura.
Është herët për të folur për përcaktime dhe nëse pretendon për të marrë rezultat, duhet parë fusha e lojës”, u shpreh Cungu. /Erjon Allaraj-Vipsport.al/
