Për ndeshjen e së dielës ndaj Laçit, në formacionin e Vllaznisë pritet të ketë pak ose aspak ndryshime në krahasim me sfidën e kaluar ndaj Luftëtarit. Trajneri Cungu vazhdon të ketë si parim pune, atë të besimit tek të njëjtët futbollistë që luajnë mirë në ndeshjen paraardhëse dhe kështu do të veprojë edhe këtë herë. Këtë e vërteton fakti se në portë edhe në këtë takim mendohet të jetë Selimaj, pavarësisht se malazezi Agoviç është rikuperuar nga dëmtimi që ka patur. Por forma e mirë që tregoi shkodrani në Gjirokastër, ka bërë që stafi teknik të vazhdojë t’i besojë atij sërish edhe këtë javë. Në mbrojtje ndërkohë nuk do të ketë ndryshime. Me Gocajn në të djathtë, Bicajn e Vrapin në qendër dhe Pjeshkën në të majtë. Edhe treshja e qendrës së mesfushës nuk do të ketë ndryshime, me Krymin, Bardullën e Tafilin ndërkohë që ka një dyshim vetëm për mesfushorin e krahut të majtë. Kjo ngaqë trajneri Cungu gjatë këtyre ditëve ka provuar Çinarin në vend të Kalajës dhe tashmë mbetet për t’u parë se cili prej tyre do të jetë në fushë ndaj kurbinasve. Në krahun e djathtë do jetë kapiteni Shtubina ndërsa në majë të sulmit sërish Bakaj. Me këtë formacion, Vllaznia do të kërkojë të parën fitore ndaj Laçit në këtë sezon. Një fitore kjo që do të kishte shumë vlerë edhe për ecurinë e mëtejshme të skuadrës në kampionat sepse do të krijonte një shkëputje goxha të konsiderueshme me këtë kundërshtar dhe do të ishte më e qetë për vazhdimin e kampionatit.© shkodrasport.com
