Ka lindur në Amerikë, po rritet në Itali, por sigurisht që mendjen dhe zemrën i ka në Shqipëri. E kemi fjalën për një djalosh vetëm 14 vjeçar, Daniel Sykun. Familja e tij është nga Bregu i Matës dhe origjinën e ka nga Shkreli i Malësisë së Madhe. Ka pasaportë amerikane, por ka vendosur që bashkë me familjen e tij të jetojë në Bergamo, aty ku që prej moshës 6 vjeçare merret edhe me futboll.
Ka zgjedhur të luajë si portier, është i gjatë 1.83 m dhe aktualisht është pjesë e ekipit U15 “ACOS” Treviglio të Bergamos. Aktualisht skuadra e tij renditet në vendin e katërt në kampionatin ku merr pjesë dhe ditën e djeshme ajo e ka fituar ndeshjen e rradhës me rezultatin 5-1 ku portieri Syku bëri paraqitje shumë të mirë.
Vetë Danieli është shprehur i gatshëm për të dhënë një intervistë të shkurtër për gazetën “Shkodra Sport”, madje bashkë me të ka folur edhe trajneri i tij.
– Si ndiheni tek ky ekip?
Ndihem shumë mirë tek ky ekip, sepse luaj rregullisht në formacion dhe kam një përgjegjësi të madhe sepse më është besuar mbrojtja e portës.
– Pse keni zgjedhur rolin e portierit?
Ndoshta konstrukti im i trupit, pasioni dhe zgjedhja ose preferenca e trajnerëve, më kanë bindur të jem besnik i portës.
– Nëse arrini nivele te larta, a mendoni që një ditë të vishni fanellën e ndonjë ekipi shqiptar dhe nëse po, cilin ekip do të zgjidhnit?
Patjetër, është një ëndërr e çdo të riut që merret me sport të përfaqësojë vendin e tij dhe skuadrën e zemrës. Unë jam malësor, babai im- Bardhi, është me origjinë nga Shkreli, pavarësisht se është lindur e rritur në Tale-Lezhë, ai është tifoz i Vllaznisë dhe unë do të zgjidhja Vllazninë të luaja.
– Ëndërroni të vishni ndonjëherë fanellën e kombëtares Shqiptare?
Pse jo. Nëse me ndihmën e Zotit do të eci mirë, do kisha dëshirë ta provoja këtë ndjesi të jashtëzakonshme.
Ndërkohë, gazeta i ka marrë një mendim në lidhje me këtë portier edhe trajnerit të tij Andrea Rabboni.
“Është një djalë i mrekullueshëem, shumë punëtor, ka pasion të madh. Ka dy vitet e fundit që është rritur shumë në këtë rol. Ai po stërvitet 4 herë në javë sepse dëshiron të rritet nga ana profesionale. Danieli ka një konstrukt trupi fizikisht shumë të mirë.
Ka daljet dhe grushtimet e topave mjaft të mira. Di shumë mirë vendosjen brenda tre shtyllave. Ka dalje të sigurta të fuqishme. Ka një rritje në të gjtha drejtimet, është portier me një të ardhme mjaft premtuese. Po luan vazhdimisht ne formacionin e pare dhe besoj se ka një të ardhme të sigurtë përpara”- është shprehur ai.
Nga Italia
Engjell Gjolaj
