Nuk ndryshon asgjë në klubin e Napolit, ku situata mes presidentit Aurelio De Laurentis dhe futbollistëve të skuadrës italiane vazhdon të jetë e tensionuar, edhe pse palët janë takuar “miqësisht” ditën e sotme.
Ekipi kishte kryer stërvitjen për ndeshjen ndaj Bolonjës kur presidenti ka zbarkuar në qendrën stërvitore për t’u takuar me futbollistët.
Një orë mbledhje, aty ku De Laurentis bashkë me drejtorin sportiv Guintoli, ka filluar me falënderime e përgëzime për barazimin e siguruar në “Anfield” ndaj Liverpulit. Një rezultat që i mundëson Napolit të jetë i qetë para ndeshjes së fundit duke pasur në dorë fatin e vet për kualifikimin e mëtejshëm në Ligën e Kampioneve.
Por pas komplimenteve, është kthyer diskutimi për gjobat që klubi u ka vënë lojtarëve dhe këtu De Laurentis ka qenë i prerë. Ai ka bërë të qartë se të gjithë do të paguajnë pjesën e tyre, pasi kanë refuzuar një urdhër direkt nga klubi dhe se gjëra të tilla ishin të patolerueshme.
Në fakt, mendohej se Napoli do t’i hidhet lojtarët edhe në gjyq administrativ për prishje imazhi, por kjo nuk do të ndodhë me sa duket.
Ndërkohë, De Laurentis është takuar veçmas me Mertens dhe Kajehon, për të filluar me ta bisedimet për rinovimin e marrëveshjeve aktuale. Për momentin nuk dihet ende nëse dy futbollistët do të pranojnë apo jo të qëndrojnë pjesë e këtij klubi. /vipsport/
