Asambleja e Klubit të Futbollit “Vllaznia” u zhvillua dje dhe zgjati jo pak, por katër orë. Debatet kanë qenë të shumta dhe mjaft të ashpra, pasi këshilltarët i kanë kërkuar llogari kryebashkiakes së Shkodrës dhe presidentes së Vllaznisë, Voltana Ademit, për rënien e skuadrës nga elita e futbollit shqiptar.
Fatlum Nurja ishte këshilltari, i cili ka debatuar më ashpër me Ademin për çështje të ndryshme që kanë të bëjnë me Vllazninë, kryesisht me pagesat e larta që janë dhënë për ekipin dhe stafin teknik, ndërkohë që ka pasur një tavan në këtë drejtim të vendosur nga Këshilli Bashkiak, që nuk është respektuar.
Kryebashkiakja Ademi është munduar të shpjegojë gjithë situatat që ka kaluar Vllaznia, duke theksuar se gjithmonë ka qenë aktive për të mirën e saj.
Skuadra shkodrane mbetet ende pezull, pasi dje nuk është marrë asnjë vendim për administratorin e ri, apo çështje të tjera organizative. / Vipsport/
