“Arena Kombëtare” është drejt përfundimit të punimeve dhe më në fund, duket se Shqipëria do të zhvillojë ndeshjet e saj në stadiumin e ri Kombëtar. Forma e stadiumit, kapaciteti dhe cilësia ka ngjallur shumë polemika dhe në emisionin “Pressing” ka pasur një debat në lidhje me këtë stadium mes Eduard Prodanit, ish-sekretar i FSHF-së dhe Arben Dervishajt që ka rolin e inxhinierit në stadiumin e ri.
Prodani e ka konsideruar Federatën një ndërmarrje ndërtimi duke qenë se po investon vetëm në ndërtime, ndërkohë që ende nuk është zhvilluar futbolli në Shqipëri. Ai e ka kritikuar Federatën edhe për çmimet e biletave të Kombëtares, teksa nga ana tjetër, Dervishaj shprehet se gjithçka është e rregullt.
“Arben Dervishaj: stadiumi është “Arena Kombëtare” dhe presim kush do të jetë sponsor për t’i vënë emrin. Kur ndërtohet diçka ka polemika pasi disa kënaqen e disa jo. Ky stadium po përfundon siç ishte projekti. Para 3 vitesh u paraqit dhe sot është zbatuar tamam.
Tribuna perëndimore (VIP) nëse nuk do të ruhej shkalla, bëhej më madhe. U ruajt shkalla monumentale dhe ka ngrënë shumë vend dhe është ndërtuar me projektin origjinal. Kaluam me tribunë pak më të madhe se “Qemal Stafa”. Tribuna “VIP” ka dy kate sepse ka “Sky Box” por na pengonte shkalla monumentale. Stadiumi nuk është vetëm tribuna.
Një stadium që ka ambiente tregtare dhe ka një kullë që është hotel. Të gjitha pjesët tregtare i shërbejnë qytetarëve. Ka çdo ambient të duhur, restorante Vip-i, ambiente mediesh dhe gjithçka duhet.
VAR? Do të mbyllim dosjen për konkurrimin për finalen e Superkupës pasi dy herë kemi konkurruar me projekt por UEFA është skeptike dhe janë të saktë. Këtë radhë jemi me projekt real dhe të gjitha janë sipas asaj që mund të organizojmë finale Superkupe apo ndeshje të Italisë, Anglisë. Teknologjia “VAR” vjen edhe me fugon sepse nuk ëhstë shumë problem.
Eduard Prodani: Federata a nuk e dinte se kur një stadium është vetëm projekt, UEFA nuk e merr fare në konsideratë? Apo e bëtë kështu, sa për publik. Është tallje me publikun
Dervishaj: Edi, ti mund të bësh ironi sa të duash. Menduam se do ta mbarojmë dhe ata po investojnë në të. Kishin besim se do ta bënim.
Prodani: Ka thënë Platini në takim me Berishën se do të bëhet kur të ndërtohet stadiumi.
Dervishaj: Ne kemi zënë radhën sepse nuk jemi të parët që refuzohemi. Finalja në një stadium do të bëhet. UEFA ndjek edhe rregulla për ndarje gjeografike. Fitoi Shkupi, Stambolli dhe nuk pritej të fitojë menjëherë Shqipëria.
Prodani: Kam konflikt interesi dhe janë shumë gjëra që tha Dervishaj. Dua ta pyes se stadiumi duhet të përfundonte në verën e vitit 2018 dhe ndodhën të papritura pasi ndërtimi i një vepre të madhe i sjell këto. Kam dhënë 2-3 dreka me baste miqësore sepse drejtuesit e FSHF-së kanë thënë “përfundon këto 3 muaj, përfundon këto 3 muaj të tjerë”. Kaq të paparashikueshme kanë qenë vonesat?
Dervishaj: Afati që vumë ishte i parealizueshëm. Ka pasur pengesa që nuk vareshin nga ne, pasi kemi bërë presione. Sheshi nuk kishte përfunduar.
Prodani: Nuk e pengon sheshi jo, pasi stadiumi ende nuk ka përfunduar…
Dervishaj: 90% e stadiumit ka përfunduar. Aty ku punohet është tribuna qendrore në zonat e restoranteve.
Prodani: Po, edhe fusha.
Dervishaj: Ajo bëhet gati shpejt.
Prodani? I sigurt je?
Dervishaj: Në datën 17 nëntor do të jetë gati për ndeshjen me Francën, ndërsa do të bëjmë edhe një ndeshje kontrolli jo zyrtare. Jemi pak mbrapa me pjesën e bareve dhe restoranteve. Po përfundon vendosja e sedileve dhe pastaj do të ketë sistemimet e fundit dhe pastrimi. Me planet që kemi, përfundon infrastruktura.
Prodani: ka ndodhur dikur që Franca ka shkuar në Bukuresht dhe Riberi xhironte në fushë. Mos e keni marrë tapetin e hollë?
Dervishaj: Jo, nuk është i hollë. Do të jetë tapet më i mirë se ai në “Elbasan Arena”.
Prodani: Çmimet janë politikë e gabuar sepse duhet promovuar futbolli. 50 mijë lekë bileta është çmim shumë i lartë pasi kam parë biznesmenë që tërhiqeshin ose e kërkonin falas. Ndoshta ky është koncepti dhe mentaliteti. Ne shohim çmime 2-3 mijë lekë të vjetra dhe kur bëhen kaq, nuk vijnë tifozat. E tillë është gjendja ekonomike dhe është absurd të krahasohesh me Francën.
Dervishaj: Futbolli nuk është për hallexhinj.
Prodani: Federata është bërë një ndërmarrje ndërtimi. Po investoni miliona euro në zyra ndërsa jashtë janë fëmijët e zhveshur në dimër. Ky është fakti. Federata ka zyra. Unë kështu kam folur gjithmonë. Nuk e kam unë fajin për ato që ndodhin në Federatë.
Unë nuk mbaj dy qëndrime dhe hiqeni këtë “gërnetë”. Po bëni politikë të gabuar dhe po bëni një ndërmarrje ndërtimi sepse llogarit sa shpenzime po bëni. Zhvilloni futbollin njëherë pastaj zyrat. /VipSport/
