Bora që ka zbardhur Romën duket si një skenar fabule, si një përrallë që po jeton aktualisht trajneri Gennaro Gattuso.
I promovuar nga ekipi i të rinjve, te ekipi i parë i Milan, pas shkarkimit tëish-trajnerit Vincenzo Montella, “Ringhio” nuk është dorëzuar për atë barazim të bujshëm ndaj Beneventos në debutim.
Përkundrazi ka rindërtuar një Milan të aftë për tu ngritur në klasifikim, sikurse dhe për tu kualifikuar për të tetat e Europa League, në një përballje ndaj Arsenal.
Dhe pas fitores në “Olimpico” kundër Romës, “Djalli” do të rikthehet të luajë në Kupën e Italisë, kur të mërkurën do të ndeshet me Lazion në kërkim të finales, sërish në “Olimpico”, në sfidën e dytë, pas barazimit 0-0 në “San Siro”.
Gjithsesi Gattusos, kjo borë në kryeqytet nuk duket se po i pëlqen shumë, me Romën që është goditur nga temperatura polare në pre të kaosit.
Aq ftohtë sa që trajneri kuqezi u detyrua të spostojë seancën stërvitore në palestrën e hotelit. “Jemi disi të nevrikosur, sepse që këtu nuk shihej dëbora.
Punuam në palestër, por do të kisha preferuar të punoja në fushë. Duhet të tregohemi të kujdesshëm ndaj Lazio, një skuadër e ndërtuar mirë, që përmban kualitet dhe e vështirë për tu ndeshur.
Do të nevojitet të bëjmë ndeshjen perfekte”, deklaroi Gattuso.
Trajneri kuqezi është i kënaqur për fitoren kundër Romës, me një performancë që duhet të qëndrojë e tillë, por dëshiron që Milan të ngrejë edhe më shumë stekën, pa u kënaqur kurrë:
“Përballemi me skuadra që kanë futbollistë të mëdhenj në nivel individual. Duhet të dëshmojmë kompaktësi dhe të vazhdojmë të bëjmë mirë, sikurse në dy muajt e fundit.
Gjëja më e rëndësishme është të rekuperojmë energjitë, të kuptojmë mirë konceptet dhe si përballohen disa skuadra”. /telesport/
