Në Shkodër rrallë bie borë por kur bie, çdo gjë sa I takon sportit thuajse paralizohet. Ekipet e futbollit sidomos e vuajnë shumë mungesën e ambjenteve sportive të mbuluara dhe shumica e ekipeve të moshave, dje ose e ka bërë pushim, ose është sistemuar në ndonjë sallë force sa për të thënë se bëmë stërvitje. I njejti problem thuajse edhe për ekipin e parë. Trajneri Vata nuk e ka parë të arsyeshme ta dërgojë ekipin në pallatin e sportit ngaqë sipas tij lagështira e parketit mund të ndikojë për keq tek sportistët. Për rrjedhojë, kuqeblutë dje pasdite kanë zhvilluar fushën e kalçetos të kompleksit sportive “Te 10-ta” për të zhvilluar seancën e rradhës. Kuptohet që përmasat e kësaj fushe nuk janë shumë normale për një ekip futbolli, aq më tepër në prag të një ndeshje shumë të rëndësishme siç është ajo që do luajë Vllaznia ditën e dielë në Vlorë ndaj Flamurtarit. Siç dihet, vetëm dy ditë më parë me ekipin është bashkuar edhe mbrojtësi kroat Vuk që mendohet të jetë në formacion për ndeshjen e rradhës por trajneri ende nuk ka patur mundësi të aplikojë një skemë loje për të parë vendosjen e tij në fushë por edhe të lojtarëve të tjerë. Problemi shkon edhe më tej sepse nga sa duket dhe nga sa parashikohet, dëbora do vazhdojë të qëndrojë edhe për disa ditë të tjera në Shkodër. Në kushte të tilla, edhe stërvitja e sotme e Vllaznisë do të jetë në një fushë kalçetoje të mbuluar. Gjatë ditës së djeshme u hodh ideja që ekipi të largohej që sot nga Shkodra për në një qytet tjetër, ndoshta në Durrës, Fier apo gjetkë në mënyrë që t’I zhvillonte atje përgatitjet për këtë ndeshje. Në fund, nga bisedimet e bëra mes drejtuesve, kjo ide ka rënë poshtë dhe kuqeblutë do vazhdojnë të stërviten në qytetin e tyre. Edhe taktika e lojës anti- Flamurtar pritet të bëhet në miniaturë megjithatë shpresat për një rezultat pozitiv ekzistojnë. Ajo çfarë pritet është ulja sërish e temperaturave nga e diela e në vazhdim, e në kushte të tilla, dëbora që ka mbuluar stadiumin “Loro Boriçi”, pritet të ngrijë. Shtresa e saj në tapetin e stadiumit dje ka qenë rreth 30 cm ndërkohë që edhe mbrëmë kanë vazhduar reshjet. Në kushte të tilla vihet në dyshim me shumë mundësi edhe zhvillimi I ndeshjes së ardhshme me Skënderbeun për kupë në mesjavën e ardhshme. Kjo ngaqë drejtuesit e klubit shkodrane ende nuk kanë filluar të mendojnë për largimin e dëborës nga fusha. Madje as plane nuk janë bërë për këtë gjë duke menduar ndoshta dhe duke pritur shkrirjen e saj vetë. Sinoptikanët megjithatë nuk parashikojnë mot të mirë edhe në ditët në vazhdim dhe prandaj dëbora do vazhdojë të jetë present në tapetin e “Loro Boriçit”. E njëjta situatë pat ndodhur edhe vitin e kaluar pikërisht para një ndeshje të rëndësishme të Vllaznisë në Shkodër dhe nga ajo, u angazhuan shumë struktura për largimin e masës së bardhë nga fusha dhe ajo u arrit në një kohë record prej 48 orësh. Këtë herë, gjërat duket se nuk janë marrë seriozisht dhe me shumë mundësi, rrezikohet zhvillimi I ndeshjes Vllaznia- Skënderbeu në këtë stadium mesjavën e ardhshme.
Gjergj KOLA
