Të shtunën në ora 14.00 në fushën sportive “Reshit Rusi” do të luhet një ndeshje shumë interesante e vlefshme për kampionatin e kategorisë së parë në mes Veleçikut dhe Dinamos.
Koplikasit duan fitoren për të ruajtur serinë e fitoreve në fushën e tyre ndërsa të njëjtën gjë do të kërkojnë edhe blutë për të ruajtur hapin e Vllaznisë dhe pretendimet e kreut.
Tek skuadra veriore ka besim se do ia dalin të marrin trepikëshin e rradhës. Sulmuesi kryesor i këtij ekipi Denis Çokaj në një prononcim për “Shkodra Sport” do të shprehej kështu për këtë ndeshje: “Patjetër që objektivi jonë edhe për këtë ndeshje do jetë fitorja.
Kemi dy javë që punojmë për këtë takim dhe atmosfera në skuadër është shumë e mirë. Aktualisht ka vetëm një problem me Tomën i cili ka një dëmtim por shpresoj të rikuperohet edhe ai dhe të jetë në fushë të shtunën.
Jam i bindur se Veleçiku do ta mundë Dinamon dhe për këtë do të përmendja dy arsye: Kemi një tifozëri të shkëlqyer dhe e dyta, kemi bërë një futboll të bukur gjatë gjithë kampionatit dhe e meritojmë të fitojmë sërish”.
© shkodrasport.com
