Shumë interes për klasiken e futbollit shqiptar, Vllaznia- Tirana. Në kryeqendrën e Veriut ka ditë që flitet në lidhje me këtë takim dhe padyshim që dëshira e tifozëve është për të qenë të pranishëm në këtë ndeshje, por kjo është e pamundur për shkak të situatës së krijuar nga pandemia.
Në lidhje me këtë ndeshje dhe situatën që po kalon Vllaznia, ka folur ne emisionin “Star Sport” edhe radiokronisti i njohur Edmond Dibra i cili ka deklaruar:
“Ndeshja klasike e futbollit shqiptar Vllaznia- Tirana pritet me mjaft interes. Ky është momenti më i mirë i skuadrës shkodrane në 10 vitet e fundit.
Ajo që të bie në sy është serioziteti me të cilin punohet, harmonia në mes lojtarëve dhe stafit. Një frymë e tillë pozitive kuptohet që të jep shpresë për vazhdimësinë e rezultateve pozitive.
Shpresoj që skuadra shkodrane të shpalosë vlerat e saj më të mira në fushën e lojës. Sa herë që janë përballur këto dy skuadra me njëra-tjetrën kemi patur takime shumë interesante që kanë dhuruar lojëra dhe emocione të mëdha.
Vllaznia besoj se ka më shumë shanse për ta fituar këtë ndeshje sepse atmosfera në rradhët e saj është më e mirë, ndërkohë që tek Tirana ka patur ndryshime edhe në pankinë.
Ka ardhur në krye të saj Nevil Dede që e ka drejtuar edhe më parë fakt këtë ekip për disa muaj. Ai nuk ka përvojën e duhur dhe nga kjo gjë duhet të përfitojë ekipi shkodran”./SHKODRA-SPORT.COM/
