Vllaznia fiton dhe golat i bëjnë sul muesit. Në çdo rast të tillë, realizohet skenari më i dëshiruar për çdo trajner. Për Brdariç, golat u realizuan nga sulmuesi titullar dhe nga ai që u fut si zëvendësues nga stoli.
Në fund të ndeshjes, Dilaver ka treguar për “Panorama Sport” emocionet, dëshirën dhe premtimin e tij për kuqeblutë.
Nga ana tjetër, Marku në deklaratën e tij në përfundim të kësaj ndeshjeje të fituar ka komentuar edhe vonesën e kampionatit teksa sipas tij, bojkoti i ka shërbyer Vllaznisë si një prej skuadrave me shumë ndryshime të bëra në merkaton e verës.
GOLASHËNUESI
Dilaver i premton Vllaznisë se do të jetë viti i tij. Sulmuesi që e nis me këmbën e mbarë, në deklaratën e dhënë për gazetën pas ndeshjes, sfidon edhe korçarët duke deklaruar se Vllaznia do të kërkojë maksimumin edhe në Korçë.
“Jam shumë i kënaqur dhe shumë i lumtur që kam arritur që të shënoj sot (dje) por edhe në takimin e kaluar. Pas asaj pauze që kishim dhe periudhës së pritjes për nisjen e kampionatit, mendoj se erdhi koha që të fitojmë edhe në takime zyrtare.
Për fat, në këtë ndeshje të parë ia dolëm. Shpresoj që ky të jetë sezoni im te Vllaznia. Megjithatë, dëshiroj që në radhë të parë të kemi një gjendje të mirë dhe për më tepër ekipi të ecë mirë dhe të marrë rezultatet e kërkuara.
Nëse ecën mirë ekipi atëherë edhe unë do të jem mirë. Mendoj se gjendja ime aktuale është më e mira. Nga takimi në takim shpresoj që të jem edhe më në formë dhe të jap maksimumin në shërbim të skuadrës.
Në çdo takim ne do të shkojmë për të fituar dhe këtë do të kërkojmë edhe në Korçë. Ne kemi një ekip të mirë dhe do të kërkojmë maksimumin”, ka deklaruar Dilaver për “Panorama Sport”.
