Mbyllja e garës për këtë vit, e gjen Burrelin në vendin e katërt të klasifikimit të Kategorisë së Parë. Trajneri Ditmar Bicaj vijon normalisht stërvitjen këto ditë të fundit të 2024, duke sfiduar edhe motin e ftohtë.
Teksa pyetet për çelësin e suksesit deri tani, për “Panorama Sport” Bicaj u shpreh: “Rezultatet pozitive që kemi arritur deri tani, kanë ardhur si pasojë e punës 6-mujore që kemi bërë të gjithë së bashku. Kemi konsumuar kohë, energji dhe angazhim maksimal, duke zhvilluar stërvitje dhe marrë shumë ngarkesa si nga ana fizike dhe teknikotaktike.
Mbi të gjitha, dua të theksoj faktin se pjesa jonë më e fortë, janë dhomat e zhveshjes. Jemi një ekip i bashkuar dhe mbi të gjitha funksionojmë si një familje. Ky është çelësi i suksesit, sepse çdo gjë fillon te dhomat e zhveshjes, ku të gjithë lojtarët janë të bashkuar. Shikoj që mbështesin dhe sakrifikojnë shumë për njëri-tjetrin”.
Më tej, ai shprehet për objektivat e vëna në fillim të kampionatit dhe ecurinë aktuale. “Ekipin e kam ndërtuar me idetë e mija dhe ata lojtarë që janë afruar në bashkëpunim me administratorin Marjan Lleshaj dhe drejtorin teknik Klevis Gjoka, në përgjithësi e kanë justifikuar veten dhe janë brenda pritshmërive tona. Objektivi ynë ka qenë një vend në gjashtëshen e parë. Ecuria e deritanishme ka qenë jashtëzakonisht e mirë. Mos të harrojmë se jemi në vendin e katërt dhe kemi grumbulluar 30 pikë, kur ende nuk është mbyllur faza e dytë. Ndaj, duhet t’i kënaqemi kësaj ecurie shumë pozitive, por duhet të qëndrojmë me këmbë në tokë, sepse mundësitë janë edhe për më lart.
Asnjëherë nuk duhet të “dehemi” për këtë sukses, sepse janari vjen shumë shpejt dhe na fillon përsëri gara me kundërshtarët tanë. Do të jetë një garë shumë e fortë nga janari deri në fund të kampionatit. Ne po stërvitemi çdo ditë për të qenë sa më dinjitoz në këtë kampionat dhe për të marrë sa më shumë rezultate pozitive e kënaqur tifozërinë e zjarrtë matjane, me të cilën kemi të drejtë të krenohemi. Tifozëria është lojtari i dymbëdhjetë, që na mbështet brenda dhe jashtë fushës tonë”, përfundoi trajneri Ditmar Bicaj.
