Peter Shilton nuk harron lehtë. Kanë kaluar më shumë se 30 vjet nga ai gol me dorë i Diego Armando Maradonës në Botërorin “Meksikë 1986”, por ai episod mbetet ende një plagë e hapur për anglezët.
Dhe sidomos për njeriun që mbronte portën e përfaqësueses së “Tre Luanëve”. Shilton, që pësoi golin më të famshëm në histori, kërkon që Maradona t’i kërkojë publikisht falje, si kusht për ta takuar.
Sipas mediave britanike, Maradona, i cili pritet të udhëtojë drejt Anglisë në muajin qershor, i ka kërkuar portierit Shilton që të darkojnë bashkë për të hedhur një herë e mirë pas krahëve polemikat e së shkuarës.
Kjo ftesë është mirëpritur nga ish-portieri, por me një kusht: “Një pjesë imja, – shprehet Shilton, – me thotë se ka ardhur koha të shohim përpara, pjesa tjetër jo.
Kushti im është që para darkës Maradona të kërkojë falje për atë që ka bërë. Ishim të dy kapitenë atë ditë. Nuk e kam takuar më që nga ajo kohë. Nuk është që më ka munguar, ka kaluar shumë kohë.”
Në 2016-ën Shilton shprehu rezerva për një takim të mundshëm me Maradonën, duke u shprehur: “Të mendosh me Maradonën, më bën të ndihem keq.” Mirëpo këtë radhë duket se Shilton ka ndryshuar qëndrim.
