Sot nis epoka e futbollit higjienik, rikthehet Bundesliga, një prej pesë kampionateve kryesore në botë dhe gjithçka do të rinisë si një sport ndryshe nga ai që kemi njohur. 50 faqet e protokollit shëndetësor kanë përcaktuar deri në detajet më të vogla sjelljen e 300 aktorëve që do të hyjnë në stadium.
Por akoma më interesante është pjesa e faqeve për sjelljet e lojtarëve: të mos pështyhet, pihet nga shishja e një shoku apo kolegu dhe të mos festohet duke u përqafuar, apo thjesht duke bashkuar shuplakat. “Më mirë një kontakt me bërryla dhe me këmbë”, përshkruan DFL.
I vetmi kontakt fizik që do lejohet, do të jenë përplasjet në fushë. Edhe gjatë zëvendësimit, lojtari që hyn dhe ai që del do përshëndeten në distancë. Të gjithë të tjerët po, përfshirë rezervat (që do të qëndrojnë ulur 1.5 metra në distancë nga njëri-tjetri) dhe trajneri.
Futbollsitët janë këshilluar që të mbërrijnë në stadium me makinat e tyre personale dhe në çdo rast, klubet duhet të përdorin më shumë se një autobus për të shmangur mbipopullimin në bord. Hyrja në fushë do të bëhet e veçuar: fillimisht një skuadër, në rresht indian.
Nuk do të ketë shtrëngime duarsh, shkëmbime flamujsh, maskota. Topat do të dezinfektohen përpara dhe gjatë ndeshjes. Por kujdes duhet të tregojnë edhe aktorët e tjerë protagonistë jashtë fushe: kameramanët do të ndahen nga një barrierë pecikllasi dhe e njëjta gjë do të ndodhë edhe gjatë intervistave.
Do të lejohen 23 gazetarë televizivë dhe 10 të shtypit të shkruar. Në tribunë, delegacionet e skuadrave do të përbëhen nga vetëm 8 persona, ndërsa ato të miqve nga 4. Por do të lejohen edhe 8 pjesëtarë të stafeve teknike. Në fushë, do të ketë 5 arbitra, 22 lojtarë, 18 rezerva, 20 mes trajnerëve dhe bashkëpunëtorëve të tyre, 4 djem që mbledhin topat, 3 persona të higjienës, 3 fotografë, 4 mjekë dhe 15 kameramanë.
Kur të bjerë vërshëllima e parë sot për rifillimin e kampionatit gjerman, tifozët do të vënë re shumë pak ndryshime nga televizori. Por më poshtë janë 10 faktet më të rëndësishme që duhet t’i dini para se të uleni sot para TV për të ndjekur Bundesligën.
- HIGJIENA NË DHOMAT E ZHVESHJES
Të gjithë njerëzit që do të qëndrojnë në dhomat e zhveshjes duhet të jenë pajisur me maska dhe doreza. Distanca 1.5 metra është e detyrueshme. Përdorimi i ujit të jetë sa më i paktë. Veglat, çantat dhe sende të tjera duhet të jenë dezinfektuara para se të përdoren.
2.DYER TË HAPURA
Dyer të mbyllura? Kjo vlen vetëm për hyrjet e tifozëve. Në ambientet e brendshme të stadiumeve gjithçka tjetër do të jetë e hapur për të shmangur prekjen me duar nga lojtarët.
3.NDALOHEN GRUMBULLIMET NË TUNEL
Skuadra që del e para nga dhomat e zhveshjes duhet të zbresë e para në fushën e lojës. Ditët ku mund të takoje apo bëjë shaka me një koleg, kanë mbaruar. Askush nuk duhet të qëndrojë në tunel.
4.MUNGOJNË MASKOTAT DHE FËMIJËT
Nuk do të jenë të pranishëm fëmijë që do të shoqërojnë lojtarët në dalje të fushës, ashtu si dhe maskotat që shërbejnë për të ndezur turmën, pasi ajo nuk është e pranishme. Vetëm 300 persona lejohen të marrin pjesë në një ndeshje.
5.JO FOTO DHE SHTRËNGIM DUARSH
Fotografët nuk do të lejohen në fushë ashtu si dhe ceremonia para ndeshjes nuk do të zhvillohet. Skuadrat do të shkojnë menjëherë në gjysmëfushën e tyre e cila do të përcaktohet në dhomat e zhveshjes.
6.PANKINAT ME MASKA
Lojtarët që do të qëndrojnë në stolin e rezervave duhet të kenë sa më pak kontakt me njëri-tjetrin. Kështu ruajtja e distancës dhe mbrojtja e gojës dhe hundës është e detyrueshme.
7.TRIBUNAT SI PANKINA NË RAST EMERGJENCE
Nëse në pankinë nuk do të ketë vend mjaftueshëm për lojtarët, atëherë ata mund të ulen në tribunën sipër tyre, një pjesë e së cilës do të jetë e rezervuar vetëm për ta.
8.VETËM 10 GAZETARË
Nuk lejohen më shumë se 10 gazetarë të shtypit të shkruar në një ndeshje. Intervistat do të jenë të kufizuara.
9.TOP I KRISTALTË
Të gjithë topat e lojës duhet të dezinfektohen përpara ndeshjeve. Vetëm katër fëmijë do të jenë pas portave për të kapur topat. Këta të fundit duhet të jenë mbi 16 vjeç. Ata duhet të dezinfektojnë duart sa më shpesh gjatë ndeshjes pasi do të vihen në kontakt me topin e lojës.
10.NDALOHEN USHQIMET
Të gjitha frutat, ushqimet apo pijet, do të merren me vete nga skuadrat. Nuk lejohet asnjë ushqim i jashtëm apo shërbim katering.
