Pas lënies së karrierës futbollistike, shkodrani Auron Miloti ka nisur punën si trajner.
Fillimisht ka drejtuar një ekip 18 vjeçarësh në klubin ku mbylli karrierën si sportist, ndërsa këtë sezon ka drejtuar ekipin e të rriturve të SV Feldkirchen që merr pjesë në kategorinë e katërt të Austrisë.
Puna e mirë që ai ka bërë me të, ka bindur drejtuesit e klubit që t’i ofrojnë rinovimin e kontratës edhe për sezonin e ardhshëm ndonëse nuk ka mbaruar ky aktuali.
Kjo gjë është bërë e ditur përmes faqes zyrtare të këtij klubit por është pohuar edhe nga vetë Miloti në një prononcim të dhënë për “Shkodra Sport” kur shprehet:
“Po, kam firmosur edhe për një sezon tjetër me këtë klub. Të dyja palët jemi të kënaqura me njëra- tjetrën dhe nuk ka pse të mos vazhdojmë punën sëbashku”.
Po cila ka qenë ecuria e SV Feldkirchen këtë sezon? Trajneri shqiptar i tij shpjegon:
“Ecuria ka qenë përgjithësisht e mirë. Ndodhemi aktualisht në vendin e shtatë në renditje por në javët e mbetura mund të ngjitemi në renditje.
Janë edhe 8 ndeshje për t’u luajtur dhe ne ndodhemi vetëm 6 pikë larg vendit të dytë që të çon në kategorinë e tretë.
Ecuria e javëve të fundit ka qenë shumë e mirë dhe prandaj shpresojmë që ajo do të vazhdojë deri në fund dhe pse jo, të arrijmë këtë gjë.
Dua të them se në dispozicion kam një ekip me të gjithë djem të rinj dhe për më tepër, të gjithë janë të qytetit ku jetoj.
Ky është një ekip me perspektivë dhe prandaj u binda për ta rinovuar kontratën edhe për sezonin e ardhshëm”.
© shkodrasport.com
