Armando Cungu shikohet si kandidatura më e mundshme për të marrë drejtimin e Vllaznisë në sezonin e ardhshëm. Këtë nuk e thonë vetëm sondazhet, sipas të cilave Cungu është i preferuari i tifozëve. Burime të sigurta pranë drejtuesve të klubit shkodran konfirmojnë se ish-lojtari i kuqebluve është pranë zyrtarizimit. Shkodrani që ka kontribuar si lojtar dhe si zv/ trajner te Vllaznia shikohet si kandidati numër një, nisur edhe nga fakti që alternativat e tjera tashmë kanë rënë poshtë. Pas tërheqjes së shkodranit tjetër, Artan Bushati, por edhe “ftohjes” së Shpëtim Duros, duket se Cungu do të jetë ai që do të marrë drejtimin. Në lojë është edhe kosovari Ardian Kozniku, por drejtuesit preferojnë më shumë shkodranin, i cili e njeh më mirë skuadrën. Me Koznikun mësohet se drejtuesit e Vllaznisë janë takuar dje në Zagreb të Kroacisë, por gjithsesi nuk është arritur ndonjë akord verbal mes palëve.Klauzola – Mësohet se në kontratën e trajnerit të ri të Vllaznisë do të ketë një klauzolë, sipas së cilës nëse trajneri largohet, nuk do të përfitojë asnjë pagesë në muajt pasardhës. Në ndryshim nga kandidatët e tjerë, kjo pikë e detyruar në kontratë mund të afrojë edhe më tepër shkodranin Armando Cungu. Ky i fundit, në një deklaratë për mediat dy ditë më parë, ndër të tjera theksoi: “Nëse do të më besohet stoli shkodran do të pranoj, por së pari do të shikoj edhe strategjinë që drejtuesit e klubit do të ndjekin për këtë sezon”. Mospasja e një skuadre të plotë për të pretenduar mund të bëjë që edhe objektivat e klubit të mos jenë për të kërkuar që në fillim arritjen e majave. Mungesa e lojtarëve cilësore në Superligën shqiptare shikohet me shumë skepticizëm për ndërtimin e një skuadre pretendente, kjo jo vetëm nga drejtues të klubit, por edhe të vetë kandidatit për trajner. Kjo mund të jetë edhe një nga pikëpyetjet që vetë Cungu ka për të marrë kreun e pankinës. Po ashtu dhe mundësitë e pakta për të studiuar në kaq pak kohë lojtarë jashtë saj, mund të bëjnë që Vllaznia ta ketë të vështirë ndërtimin e një ekipi cilësor.
Admir Uruçi
