“Një fitore në Laç na afron me objektivin primar që kemi tani në këtë pjesë të sezonit, daljen në Kupat e Europës”. Kështu është shprehur mbrojtësi i djathtë i Vllaznisë, Dritan Smajli, sa i përket ndeshjes së fundjavës që do të zhvillojnë në transfertë ndaj Laçit. Me sa duket, për mbrojtësin shkodran rruga për në Europë kalon nga Laçi. Vetë ai në një bisedë për gazeten ka pohuar se vetëm tri pikët u hyjnë në punë, në një transfertë të tillë aq të rëndësishme për ta. “Si në çdo takim, edhe në atë ndaj Laçin do të shkojmë për të marrë maksimumin e pikëve. Pastaj, se sa do mund të arrihet kjo, nuk është vetëm në dorën tonë. Ne duhet të tregojmë vlerat më të mira në këtë përballje dhe të marrim një rezultat pozitiv. Nuk është se e përjashtoj si rezultat pozitiv një barazim në këtë transfertë tejet të vështirë për ne, por nëse duam të qëndrojmë brenda objektivave që i kemi vënë vetes, medoemos duhet të marrim një fitore. Kjo ka lidhje me atë që mund të arrijnë rivalët tanë direkt për vendet e sipërme në tabelën e klasifikimit. Megjithatë, një pikë është më mirë se hiç dhe kjo mund të na vlejë më tepër për aspektin moral”.Vlerësimi – Dritan Smajli, një nga shtyllat e defensivës kuqeblu, ndonëse e thotë hapur atë çka kërkon në këtë transfertë, e ka vlerësuar në maksimum kundërshtarin. Për më tepër, ai e cilëson sfidën e së dielës si një nga transfertat më të vështira që Vllaznia ka zhvilluar deri më tani. “Ndeshja e dielës ndaj Laçit do të jetë e vështirë për ne. Përballë do të kemi një skuadër me shumë ambicie dhe që në fushën e vet është e fortë. Kurbinasit zhvillojnë një lojë të mirë, e për më tepër kanë në përbërje lojtarë cilësorë. Megjithatë kjo nuk na tremb, përkundrazi. Pavarësisht vështirësive që na presin në këtë takim, ne jemi të bindur se nuk do të dalim pa pikë nga fusha e lojës”, – ka vijuar Smajli.
Gjendja – Për mbrojtësin, gjendja e përgjithshme e Vllaznisë është optimale. Mirëpo, sipas tij, e vetmja gjë jopozitive në prag të përballjes me Laçin është mungesa e kapitenit Amarildo Belisha. “Mendoj se gjendja e skuadrës është optimale. Dua të them se në aspektin psikologjik jemi OK. Po kalojmë momente të mira, gjë që duhet ta shfrytëzojmë në këtë takim. Mund të them se e vetmja gjë negative që kemi përpara kësaj sfide është mungesa e Belishës. Gjithsesi, shpresoj që reparti ynë të jetë sërish në formën e duhur”, – ka përfunduar mbrojtës i djathtë i Vllaznisë, Dritan Smajli.
Anton Zalli
