Bruno Lulaj flet si bardheblu. Në intervistën e parë si lojtar i Tiranës, mbrojtësi rrëfen për “Panorama Sport”, çfarë pret nga aventura te 26 herë kampionët e Shqipërisë. Mbrojtësi ka firmosur një kontratë të re me bardheblutë dhe është blerja e 10-të e Tiranës në merkaton e verës që sapo ka përfunduar.
Në fakt, Tiranës i duhet një mbrojtës si Lulaj, sepse po vuan në qendër të mbrojtjes. Futbollisti më parë ka luajtur me disa skuadra në Superiore, ndërsa Shehi e njeh mirë se e ka drejtuar edhe dy herë të tjera më parë te Skënderbeu e Kukësi. Lulaj ka luajtur tri sezonet e fundit te Kukësi, duke qenë në fushë në mbi 100 ndeshje. Në të tria sezonet ka qenë shumicën e kohës titullar. Vlera e tij në merkato është 200 mijë euro dhe Tirana ka bërë goditje të mirë, sepse futbollisti është afruar me parametër zero.
Bruno, një aventurë e re në karrierën tuaj, këtë herë me fanellën e Tiranës?
Ndihem shumë i lumtur të përfaqësoj ngjyrat e Tiranës, ekipit më të titulluar në vend. Është privilegj për mua dhe do të mundohem të jap maksimumin për të arritur objektivat e klubit që i dinë të gjithë, titullin, Kupën.
Jeni përfolur disa herë për të firmosur për Tiranën, por vetëm këtë sezon u zyrtarizuat si bardheblu?
E vërtetë është që kam qenë shumë pranë Tiranës. Besoj se kjo lëvizje është bërë disa vite me vonesë. Duhet të kisha ardhur më herët.
Çfarë mendoni për Tiranën dhe në veçanti për sezonin e fundit kur doli kampion?
Sezonin e fundit Tirana ishte dominuese. Me plot meritë doli kampione e Shqipërisë. Është një ekip i madh. Këtë vit është e njëjta situatë. Ndihem shumë mirë në ambientin e ri. Djemtë, stafi, që të gjithë më kanë ndihmuar të ambientohem sa më shpejt, jam shumë mirë.
Mund ta mbrojë titullin kjo skuadër aktuale?
Sigurisht që po. E ka të gjithë potencialin. Jam besimplotë që mund ta mbrojmë titullin kampion këtë vit.
Cili është kundërshtari apo kundërshtarët që do të luftojnë për titullin kampion me Tiranën?
Kundërshtari që do të luftojë me Tiranën për titullin është vetë Tirana. Ne kemi objektiv ndeshjen e radhës. Do të synojmë që çdo ndeshje të marrim maksimumin për të arritur objektivin kampion.
Do të luani te vendi i Vangjelit. Një mik i mirë juaji…
Kristi është miku im më i mirë dhe ndihem i nderuar që ta zëvendësoj. Kristi është legjendë në futbollin shqiptar dhe do të mundohem që të jap maksimumin që të arrij ta zëvendësoj.
Derbi?
Mezi e pres, të them të vërtetën. Është një emocion që do ta provoj për herë të parë. Shpresoj dhe besoj se do të dalim fitimtarë në fund të 90 minutave. Po stërvitem maksimalisht, pastaj është në dorën e stafit. Kur ta gjykojnë ata që jam 100 për qind, atëherë do të jem në fushë.
Sa miq keni në këtë skuadër?
Shumicën e djemve i njoh që më parë. Kemi qenë shokë skuadre në ekipe të tjera, si Kallaku, Xhixha.
