Dy futbollistë shqiptarë do të jenë protagonistë në finalen e madhe për titullin kampion të të rinjve në Itali.
Ashtu si një vit më parë, finalja do të jetë mes Interit dhe Fiorentinës. Por këtë radhë në fushë pritet të jenë dy shqiptarë të cilët do të jenë rivalë njëri me tjetrin për të bërë të tyrin trofeun.
Në radhët e Interit, që preu sot biletën duke mundur Juventusin 1-0, do të jetë Armand Rada, i cili në fakt nuk po luan rregullisht në këtë periudhë me zikaltërit dhe sot ndoqi ndeshjen nga stoli.
Nga ana tjetër, te Fiorentina, e cila mundi 2-0 Atalantën dhe ëndërron që këtë vit të jetë ajo që do të shpallet kampione.
Në radhët e skuadrës së qytetit të Firences është titullar i padiskutueshëm talenti shqiptar Erald Lakti, një mesfushor qendre i cili ka ditur të tregojë vlerat e tij në grumbullimet me përfaqësueset U17 dhe U19.
Asnjëri nga të dy futbollistët shqiptarë nuk ishte i pranishëm në duelin e vitit të kaluar, këtë radhë, të dy shpresojnë të jenë protagonistë me skuadrat përkatëse për të pasuruar një karrierë e cila që të rinj po u dhuron mjaft kënaqësi. /vipsport/
