Humbja e pësuar nga Barleti-Eagles ndaj Elbasanit në ndeshjen e vlefshme për Kategorinë e Dytë të basketbollit për meshkuj ka përfunduar në qendër të vëmendjes, për shkak se FSHB ka marrë e-mail nga një kompani bastesh, ku thuhet se janë luajtur shuma të mëdha për humbjen e skuadrës kryeqytetase.
“Panorama Sport” kontaktoi me Korab Llazanin, sekretarin e përgjithshëm të Federatës Shqiptare të Basketbollit, i cili u përfshi në këtë çështje pas disa mesazheve të shkëmbyera me trajnerin e Eagles, Klarent Dadaj.
Llazani fillimisht tregon për shkresën që FSHB ka marrë nga një kompani bastesh rreth ndeshjes së dyshuar si e trukuar: “Na ka ardhur një informacion të cilin e kemi bërë prezent me forumet tona, e kemi bërë prezent edhe për aktorët e këtij rasti. Pasi ua kemi përcjellë atyre tashmë këtë gjë ne do t’ua dërgojmë edhe prokurorisë që është organi i specializuar për këtë pjesë, pasi ne nuk jemi as hetues dhe as prokurorë”.
Ndërkohë, në lidhje me kompaninë e basteve që ka dërguar ankesën në FSHB, Llazani deklaron: “Ky është një objekt hetimi që do ta zbardhin organet e specializuara. Ne do t’u japim adresën elektronike dhe tekstin që ata kanë shkruar”. I pyetur nëse do të ishte më mirë që të dërgohej në prokurori para se t’u bëhej publike klubeve, ai sqaron:
“Ende nuk ishin bërë 24 orë që prej ardhjes së këtij informacioni dhe nuk jemi sh.p.k, por funksionojmë me forume. Ne kemi kërkuar informacion prej klubeve. Gjithashtu, kemi një mospërputhje edhe me kronologjinë e bisedës me trajnerin e Eagles, pasi unë i kërkoj se çfarë ka ndodhur, ndërsa ai më thotë tjetër gjë. Biseda që kam pasur me të nuk është e plotë”.
Në fund sekretari i përgjithshëm bën të ditur se ky është rasti i parë që FSHB merr një ankese të tillë prej kompanive të basteve, në lidhje me ndeshje të dyshimta. “Ky është rasti i parë që i adresohet federatës tonë dhe po veprojmë energjikisht për ta zgjidhur që në rastin e parë që ndodhi diçka e tillë.
Sigurisht, fjalë dhe aludime ka pasur edhe në të shkuarën, por konkretisht kjo është hera e parë që në federatë vjen një email për një çështje të tillë”, përfundon Korab Llazani.
