Javën e ardhshme në Marsejë të Francës do të zhvillohen Lojërat Mesdhetare në salla të mbyllura për moshën deri 23 vjeç. Në to, pritet të marrë pjesë edhe atleti shkodran Franko Burraj i cili do të konkurrojë në garën e 400 metrave.
Pavarëisht kushteve të vështira atmosferike të ditëve të fundit, 20 vjeçari shkodran është munduar ta ruajë formën e tij fizike dhe ka pretendime për thyer rekordin sërish të kësaj disipline. Por jo vetëm kaq. Trajneri i tij Bruno Rrotani është i bindur se nëse gjërat shkojnë ashtu si duhet, Burraj do të jetë edhe në zonën e medaljeve.
Ai e bazon këtë gjë tek forma e sportistit por edhe konkurrentët e mundshëm në garë. Kujtojmë këtu se në qershorin e kaluar në Lojërat Mesdhetare verore ku kanë garuar të rriturit, Franko ndonëse pa përvojën e duhur arriti një kohë shumë të mirë duke u renditur i gjashti.
Tashmë me 23 vjeçarët padyshim që do të tentojë futjen në treshen e më të mirëve dhe pse jo edhe medaljen e artë. Në garat e qershorit të kaluar, atleti i Vllaznisë theu dy herë rekordin kombëtar të garës së 400 metrave, rekord që prej 21 vitesh mbahej nga shkodrani tjetër Ilir Xhani.
Tashmë do të tentojë të thyejë edhe rekordin e sallave të mbyllura dhe kjo do të ishte diçka fantastike. Kemi të bëjmë me një sportist me shumë perspektivë i cili është një nga më të mirët aktualisht në Shqipëri bashkë me të mirënjohurit Izmir Smajlaj dhe Luiza Gega.
Nga Franko Burraj tashmë presim që në çdo garë që ai merr pjesë, të kapë vendet e para ose rekorde kombëtare dhe kjo e bën atë sportistin e momentit në Shkodër.
© shkodrasport.com
