Calzona është një trajner i përkoshëm te Napoli dhe ai e di këtë gjë. Pasi të përfundojë kampionati, ai do të rikthehet për të udhëhequr Sllovakinë me kohë të plotë, nëse nuk arrin mrekullinë për t’i siguruar Napolit një vend në Champions League sezonin e ardhshëm. Në këtë moment topi i kalon presidentit De Laurentiis i cili në fund do të zgjedhe trajnerin e ri.
Ëndrra e tij mbetet ajo e njohur nga të gjithë: Antonio Conte. Ish-trajneri i Juventusit dhe Interit refuzoi të mbërrijë gjatë sezonit aktual, por është shumë e vështirë që ai të vendosë t’i bashkohet Napolit duke filluar nga korriku i vitit 2024. De Laurentiis gjithashtu e ka vlerësuar gjithmonë Vincenzo Italiano, trajnerin e Fiorentinës, për futbollin sulmues dhe efektiv që ai gjithmonë aplikon te ekipet e tij.
Por një emër tjetër duket se po fiton terren dhe nuk është një trajner dosido. Sipas “sportmediaset”, Napoli po mendon të sjellë në stol Stefano Pioli, trajnerin aktual të Milan. Kontrata e tij me kuqezinjtë skadon në verën e vitit 2025, por ka shumë dyshime nëse ai mund të mbetet ende te Milan pasi të përfundojë ky sezon.
De Laurentiis e respekton atë si nga pikëpamja njerëzore ashtu edhe nga ajo teknike, për aftësinë e tij për të shfrytëzuar sa më shumë elementët e disponueshëm duke përshtatur parimet e tij me karakteristikat e lojtarëve dhe kundërshtarëve. Për këtë, tashmë, duket se Pioli është njeriu i duhur për pankinën Napoli./telesport/
