Pas ekipit të meshkujve, edhe ai i basketbollit të femrave të Vllaznisë është përforcuar me një lojtare të huaj. Dhe sërish bëhet fjalë për një amerikane dhe pikërisht Taylor Brooke Dunnris.
Sipas informacioneve që “Shkodra Sport” merr nga stafi i ekipit shkodran, mësojmë se bëhet fjalë për një lojtare që luan në pozicionet 2 dhe 3, është 25 vjeçe dhe e gjatë 1.70.
Trajneri Bledar Gjeçaj është shumë i kënaqur që më në fund u bë realitet ardhja e një lojtareje të huaj që do ta forcojë jo pak ekipin e tij. Dunn ka luajtur në Amerikë dhe kjo do të jetë përvoja e saj e parë jashtë këtij shteti.
Drejtuesit e ekipit shkodran ndërkohë i kanë bërë të gjitha lëvizjet e duhura dhe e kanë federuar lojtaren në fjalë, çka do të thotë se të shtunën në ndeshjen e parë të kampionatit, atë ndaj Teutës Dunn pritet të jetë në fushën e lojës.
Vllaznia edhe pa përforcime ka arritur të jetë në katërshen e parë por tashmë duket se me ardhjen e kësaj lojtareje do të tentojë edhe diçka më shumë, por kjo mbetet për t’u parë./SHKODRA-SPORT.COM/
