Pas ngjarjes së disa ditëve më parë kur u kërcënua me thikë trajneri i Vllaznisë, Ernest Gjoka, sot ka ndodhur sërish një ngjarje e turpshme në qytetin e Shkodrës, ku persona të paidentifikuar kanë dëmtuar makinën e trajnerit të Vllaznisë B, Ervis Kraja.
Personat në fjalë kanë shpuar gomat e makinës së Krajës, duke dhënë idenë e një kërcënimi. I kontaktuar nga “Vip Sport”, tekniku Kraja është shprehur se nuk ka ndonjë ide se kush mund ta ketë bërë këtë por shpreson që të përfundojë këtu.
“Nuk e di se kush mund ta ketë bërë. Unë lëviz i lirë nëpër Shkodër, eci në këmbë dhe në stërvitje shkoj i vetëm pa qenë e nevojshme të kem një shoqërues.
Më pyetën shokët nëse është ndonjë kamera e fshehtë por nëse do të ishte ashtu, atëherë do dilte personi dhe do më sillte goma të reja.
Nuk kam bërë denoncim sepse nuk di kë të denoncoj. Shpresoj që kjo të ketë qenë e keqja më e madhe dhe të jenë kënaqur me kaq, pa e zgjatur më tej”- u shpreh trajneri i Vllaznisë B, për “Vip Sport”.
