Hekuran Kryeziu është një ndër emrat më të lakuar në kampionatin zviceran. Futbollisti i përfaqësueses së Kosovës është afirmuar si një prej mesfushorëve me tipare mbrojtëse më të mirë në qarkullim, falë edhe aftësisë që ka për të nisur lojën nga thellësia.
Këto dy elementë loje të kombinuara kanë bërë futbollistin 25-vjeçar të ndiqet edhe nga klube të njohura, sidomos ato italiane, të cilat janë gati të sigurojnë firmën e tij.
Sampdoria, Xhenoa dhe Lacio janë skuadrat të cilat janë shprehur të interesuara për talentin e tij dhe në verë pritet të ketë zhvillime të reja sa i përket karrierës së mesfushorit.
Por për Kryeziun ka një pengesë të vogël: kontrata e tij me Luzernën.
Normalisht, Kryeziu duhej të rinovonte automatikisht marrëveshjen e tij me klubin zviceran në bazë të një klauzole të vendosur në kontratë, që i jepte të drejtën klubit të zgjaste me një vit bashkëpunimin nëse futbollisti plotëson një numër të caktuar ndeshjesh.
Por Kryeziu nuk e ka plotësuar ende këtë numër dhe me sa duket nuk ka ndër mend ta plotësojë, për t’u larguar si futbollist i lirë në verë.
Sipas mediave zvicerane, Kryeziu i cili është një titullar fiks, raportohet si i dëmtuar prej disa javësh, pasi është i ndërgjegjshëm se nuk duhet të luajë shumë në sfidat e mbetura për të mos i dhënë mundësinë klubit të aktivizojë këtë klauzolë.
Lojtari nuk ka pranuar të tregojë se cili është numri i ndeshjeve dhe ka bërë të ditur se aludime të tilla janë absurde.
“Jam profesionist dhe dua të luaj gjithmonë në çdo ndeshje. Është e çuditshme të më akuzoni një gjë të tillë.
Por çfarë është e shkruar në kontratën time me Lucernën, mbetet mes nesh”, tha ai, duke refuzuar të tregonte edhe sa ndeshje i duheshin për rinovimin automatik.
Ndaj për mediat zvicerane, fjalë të tilla ngjanin më shumë si një pohim sesa një mohim i faktit se ai po mendon këtë alternativë origjinale për t’i dhënë lamtumirën skuadrës së Lucernës. /vipsport/
