Ka disa vite që bën një punë të mrekullueshme me ekipet e moshave të Vllaznisë dhe duket se ka ardhur momenti që të kurorëzohet me një trofe.
E kemi fjalën për Brikeno Bizin, njeriun që nën drejtimin e Vllaznia U17 sot ka hedhur një hap shumë të rëndësishëm drejt të shpallurit kampion i këtij sezoni.
Me ekipin e tij ka fituar 2-1 “derbin” me KF Shkodra dhe tashmë i ka mbetur edhe një pengesë për të kaluar, ajo e finales ndaj ekipit të Shënkollit.
Bizi ka meritën e jashtëzakonshme tek këto rezultate teksa sëbashku me ndihmësin e tij Ylad Pirani, trajnerin e përgatitjes atletike Fation Kadija dhe dy drejtuesit e Akademisë, Qashif Hoxha dhe Alban Neziri, po bëjnë mirë në kampionatin e sivjetëm.
Nën drejtimin e këtij ekipi, Bizi i ka shkuar disa herë pranë fitimit të trofeve, por nuk ia ka dalë. Këtë herë synimet janë të qarta për t’u kurorëzuar si kampionë të vendit për këtë grupmoshë.
Brikenoja po krijon tashmë profilin e tij si një trajner i suksesshëm me ekipet e moshave dhe padyshim që tashmë ai “nuk është më” djali i të madhit Sabah Bizi. Ka krijuar profilin e një trajneri të suksesshëm dhe për këtë arsye, trofeu i titullit kampion javën që vjen, i duhet për ta përforcuar edhe më shumë këtë gjë. Dhe në fakt e meriton, për gjithë atë kontribut të dhënë prej kaq sa vitesh.
www.shkodrasport.com
