Vllaznia e sivjetme duket e tjetërsuar sepse me ardhjen e sponsorit Xhaferi tashmë ka më shumë angazhim nga të gjitha palët për të bërë më mirë. Njëkohësisht, ka edhe më shumë persona të angazhuar, por nga ana tjetër, kjo nuk do të thotë se ato që sapo kanë ardhur në klub, kanë nënvlerësuar punën e bërë më përpara.
Madje, drejtori sportiv Matko Djarmati, gjatë fjalës së tij në emisionin “Sport Shoë”, ka vlerësuar maksimalisht administratorin Suad Lici, duke thënë se ajo që e ka bërë ai i vetëm, ka qenë e pabesueshme.
“Kam respekt e vlerësim maksimal për administratorin e Vllaznisë. Çfarë ka bërë Suad Lici është e pabesueshme. Gjatë dy viteve të fundit, ai i vetëm ka bërë atë punë që sot jemi duke e bërë 6 vetë. I ka bërë të gjitha i vetëm dhe prandaj meriton vlerësim maksimal”.
Njëkohësisht, Djarmati, ka zbuluar edhe diçka tjetër në raport me administratorin Lici, por që sipas tij tashmë gjërat kanë ndryshuar tërësisht dhe raportet mes tyre janë të shkëlqyera.
“Në fillim të punës, kemi patur kontradita me të, ndoshta nuk mund të them debate, por nuk kemi qenë në të njëjtën linjë me të, por pastaj e kam kuptuar se çfarë pune të vështirë ka bërë ai këto dy vjet dhe në fund të fundit, Lici është një person që e njeh futbollin shumë mirë.
Suadi është një ish- futbollist shumë i mirë, e njeh në detaje atë dhe tashmë kemi një bashkëpunim shumë të mirë dhe patjetër që edhe ai ka pjesën e tij të rëndësishme tek ndërtimi i skuadrës aktuale”- ka thënë drejtori i kuqebluve./SHKODRA-SPORT.COM/
