Mund të jetë një rast i rrallë që 5 vëllezër të kenë luajtur të gjithë futboll, madje në nivele të larta dhe të kenë fituar edhe trofe.
Në Shkodër e kemi një rast të tillë me vëllezërit Gruda. Janë plot 5 të cilët kanë luajtur me shumë sukses duke qenë një rast i veçantë që duhet të marrë vëmendjen e të gjithëve dhe të marrë vlerësimin e duhur.
Ma i madhi ndër vëllezërit Gruda, është Selmani. Dashuria e tij për futbollin lindi nga pasioni me të cilin familjarët e ndiqnin Vllazninë. Dhe Selmani do të bëhej një emër i rëndësishëm për skuadrën shkodrane duke qenë një nga sulmuesit e spikatur të saj duke u shpallur dy herë kampion me të por edhe dy herë fitues i Kupës së Republikës.
Pas tij është Xhabiri, i cili në fakt karrierën do ta vazhdonte në Lezhë tek Besëlidhja duke qenë një nga futbollistët e dalluar të saj në vitet ’80.
I treti do të ishte Azizi, mesfushori që spikati me Vllazninë në fundin e viteve ’80 dhe fillimin e viteve ’90 duke u shpallur kampion dhe duke treguar vlerat e tij më të mira.
Në të njëjtën periudhë, pjesë e kuqebluve ka qenë edhe vëllai tjetër, Bujari një sulmues me vlerë i cili edhe ai ka dhënë kontributin e tij në këtë sukses dhe ndonëse kishte ende për të dhënë, u larguan shpejt drejt Gjermanisë, vend ku jeton edhe sot e kësaj ditë.
I fundit i këtyre vëllezërve është Shpëtimi, ai që luajti për pak vite në fillimin e viteve ’90 dhe u largua edhe ai drejt Anglisë, por gjithsesi arriti ta shkruante edhe ai emrin në historinë e klubit Vllaznia.
Kjo është historia e pesë vëllezërve të cilët kanë arritur të luajnë të gjithë futboll në nivele të larta duke qenë një rast i rrallë besojmë jo vetëm në Shqipëri.
Të mos harrojmë se nga këto vëllezër, sot kanë dalë pasardhësit e tyre të cilët po ashtu po merren me futboll duke pretenduar pse jo, të bëjnë karrierë më të mirë se prindërit e tyre./SHKODRA-SPORT.COM/
