Që nga momenti kur futbolli në Shqipëri u ndal plotësisht për shkak të pandemisë së koronavirusit, kemi dëgjuar në vazhdimësi klubet dhe lojtarët të kërkojnë me të drejtë ndihmë për të kaluar këtë periudhë krize.
Më të shumtë janë zërat nga Superiorja, ku sigurisht shpenzimet janë disa here më të mëdha dhe në pjesën më të madhe të rasteve, nuk përfitohet asgjë nga bashkitë, edhe pse mbeten nën juridiksionin e tyre. Por cila është shuma që duhet për të përballuar një muaj rroga të klubeve të Superiores?
Shpjegimin e jep vetë UEFA, nëpërmjet raportit të saj të fundit financiar. Aty, ajo ka detajuar se cilat janë shpenzimet që kryejnë për rrogat kampionatet e ndryshme. Për vitin kalendarik 2018, duke marrë për bazë dokumentacionin e dorëzuar nga FSHF për edicionin 2018-2019, rezulton se në total klubet e Superiores kanë paguar 4 milionë euro rroga.
Kjo sjell një mesatare të përafërt prej 330 mijë eurosh në muaj që u nevojiten së bashku të 10 klubeve të Superiores për të përballuar rrogat. Nëse arrihet akord me lojtarët për ulje të pretendimeve të tyre financiare gjatë periudhës së krizës, e nëse përjashtohen të ardhurat nga Bashkitë, shifra në fjalë bëhet edhe më e vogël.
Duke llogaritur se FSHF ka luksin të ndërtojë 8 milionë euro zyra, kjo shifër duket e papërfillshme dhe nuk kuptohet ende pse institucioni nuk ka ndërhyrë që në fillim për të subvencionuar klubet shqiptare për këto dy-tre muaj, që të mos ndjejnë peshën e krizës financiare pasi në arkat e saj ka mjaftueshëm për të përballuar atë shpenzim.
Ndoshta institucioni i futbollit po pret ndihmën e akorduar nga FIFA dhe UEFA, e cila në teori do të kalojë këtë shifër që u nevojitet klubeve shqiptare, për ta cilësuar më pas veten si shpëtimtare te futbollit shqiptar, siç ka ndodhur edhe më parë, sigurisht me paratë që nuk janë të sajat. /vipsport/
