Tri herë fituesi i Kupës së Botës, Pele, e ka mbështetur sulmuesin e PSG-së, Kylian Mbappe, që të “përputhet” me arritjet e tij të shkëlqyera në karrierë. Pele konsiderohet gjerësisht si një nga lojtarët më të mëdhenj të futbollit, skenë në të cilën ka shpërthyer si 17-vjeçar në Kupën e Botës 1968, duke e ndihmuar Brazilin ta fitojë turneun për herë të parë.
Ai do të vazhdonte ta fitonte përsëri Kupën e Botës më 1962 dhe 1970, duke u bërë lojtari i parë, që e fitonte këtë kompeticion madhor tri herë. Pele është golashënuesi kryesor për Brazilin, me 77 gola në 92 ndeshje. Në nivel kombëtar, Pele fitoi 25 trofe të mëdhenj në një karrierë 18-vjeçare me Santos, duke përfshirë gjashtë tituj të Brazilit dhe dy “Copa Libertadores”.
Një sukses i tillë i qëndrueshëm ende duket larg për Mbappe, i cili, vetëm 20 vjeç, është në fillimet e karrierës së tij. Megjithatë, ka disa ngjashmëri në arritjet e tij, deri tani, me karrierën e hershme të Pele. Ashtu si legjenda e Brazilit, Mbappe është një fitues “adoleshent” i Kupës së Botës dhe tashmë ka fituar disa tituj të brendshëm në Francë.
Si rezultat, 78-vjeçari thotë se krahasimet mes tij dhe të riut francez nuk janë të pajustifikuara. “Ai fitoi Kupën e Botës në moshën 19-vjeçare, unë kam qenë vetëm 17, – tha Pele për “France Football”. – Sidoqoftë, mendoj se ai mund të bëhet Pele i ri! Shumë njerëz mendojnë se e kam thënë këtë për të qeshur, por jo, nuk është një shaka”.
Mbappe u bë lojtari më i ri i Monacos, vetëm 16 vjeç dhe 347 ditë, kur luajti si zëvendësues kundër Caen, në dhjetor 2015. Futbollisti i lindur në Paris së shpejti u bë titullar i rregullt në skuadrën e Principatës, në sezonin e ardhshëm, duke e ndihmuar klubin të fitojë titullin e Ligue 1 në edicionin 2016-2017. Ai ishte vetëm 18 vjeç./telesport/
