Kampionati shqiptar i futbollit do qëndrojë pushim deri në datën 13-14 janar, kështu të gjitha ekipet e elitës sonë të top këmbës do jenë pushim. Dhe po ashtu do jenë në përgatitjet stërvitore, por edhe me mendjen tek merkato në këtë periudhë. Disa nga ekipet patjetër që duhet të përmirësojnë në lojërat e tyre duke parë edhe objektivat që kanë.
Një ndër këto skuadra është edhe Vllaznia, ku shkodranët pavarësisht se e mbyllën vitin 2022 me një fitore 4-0 kundër Teutës, nga të besuarit e Joses pritet akoma më shumë. Dhe pavarësisht suksesit ndaj durraskëve, kuqeblutë nuk janë ndër ekipet me formën më të mirë në 5 javët e fundit në kampionatin shqiptar.
Kështu ekipi fitues i kupës në fuqi ka grumbulluar 7 pikë nga 15 të mundshme në 5 javët e fundit të Superiores. Më mirë se kuqeblutë kanë bërë plot 3 ekipe, ku në 5 javët e fundit , Partizani ka marrë 10 pikë. E pas të kuqve vijnë dy skuadra me nga 9 pikë në 5 javët e fundit, Egnatia dhe Laçi kanë pasur një ecuri identike. Me kurbinasit që kanë pasur një përmirësim të ndjeshëm në raundet e fundit.
Një ecuri me 7 pikë si Vllaznia kanë pasur edhe Tirana e Teuta në 5 javët e fundit. E madje me bardheblutë shifrat janë edhe identike në gola të shënuar që janë 5 të tillë dhe po ashtu të pësur që janë 2. Me rinisjen e kampionatit tek shkodranët do kërkojnë që shifra të tilla të përmirësohen në mënyrë që të afrohen sa më shumë më zonën europiane, por edhe kreun që momentalisht mbahet nga Partizani.
Endri ÇINARI
