I pari që ka nisur stërvitjen me Vllazninë pak ditë më parë ka qenë pikërisht mbrojtësi Alis Boci. Ai ndëpreu para kohe kontratën me Luftëtarin dhe për të mos qëndruar pa stërvitje, bisedoi me drejtuesit kuqeblu për të qenë pjesë e skuadrës në procesin stërvitor. Kjo gjë nuk iu refuzua dhe ai prej disa ditësh është pjesë e stërvitjeve të ekipit shkodran. Por ndërkohë, ditët e fundit me skuadrën në stërvitje janë bashkuar edhe dy futbollistë të tjerë shkodranë. Bëhet fjalë për Jasmin Rraboshtën dhe Ari Djepaxhia.
Edhe i pari ndër ta, ka qenë pjesë e Luftëtarit deri para dy javësh, moment kur e larguan prej kësaj skuadre ndonëse sulmuesi shkodran pretendon se prej kohësh nuk paguhej nga ky klub. Tjetri, pra Djepaxhia ka qenë i dëmtuar kohët e fundit dhe prej momentit të shkëputjes nga Partizani nuk ka patur ekip. Në kushte të tilla ka filluar stërvitjen sërish për të qenë shumë shpejt në formën e duhur. Për rrjedhojë, ata kanë filluar tashmë të mendojnë për më vonë. Do jenë tek Vllaznia apo diku tjetër, kjo mbetet për t’u parë. Boci, Rraboshta e Djepaxhia janë produkt i Akademisë Vllaznia dhe si të tillë sigurisht që në Shkodër e kanë gjithnjë derën e hapur.
www.shkodrasport.com
